काठमाण्डौंः कास्कीको मादी गाउँपालिका वडा ५ मा बन्दाबन्दीका बीच घुम्ती शिविरका माध्यमबाट सर्वसाधारणको निःशुल्क स्वास्थ्य परीक्षण एवं औषधि वितरण गरिएको छ ।
चितेपानी ट्रष्टको आयोजना तथा वडा ५ समितिको विपद् व्यवस्थापन सहयोगअन्तर्गत बन्दाबन्दीका कारण स्वास्थ्यमा समस्या भएर पनि अस्पतालसम्म पुग्न नसकेका असहाय एवं अशक्तलाई लक्षित गरी घुम्ती शिविर सञ्चालन गरिएको जनप्रतिनिधि सरोज केसीले जानकारी दिए ।
उनका अनुसार सुनपँदेली, चितेपानी, देउमाणी टोलका करिब ५६ जना बिरामीले उपचार सेवा लिएका छन् । वडाभित्रका सबै नागरिकमा लक्षित यो कार्यक्रम पहिलो चरणमा सकिएको जानकारी दिँदै तत्कालै अन्य टोलमा उपचार नपाएर समस्यामा परेका सर्वसाधारणको तथ्याङ्क सङ्कलन गरी दोस्रो चरणको कार्यक्रम लिएर पुग्ने चितेपानी ट्रष्टका अध्यक्ष टीकाराम सापकोटाले बताए ।
शिविर सञ्चालनमा पोखरा स्वास्थ्य विज्ञान प्रतिष्ठानका वरिष्ठ डा राजेश अधिकारी, वरिष्ठ डा पद्म ढुङ्गाना, फार्मासिष्ट गणेश बराललगायतले सेवा दिएका छन । डा अधिकारीले बन्दाबन्दीमा पनि गाउँमै पुगेर सेवा दिन पाउँदा खुशी लागेको बताउँदै नियमित सेवा लिने सबैलाई औषधिसहित सेवा दिएको र पहिलो चरणको परीक्षणमा कुनै जटिल समस्या नपाइएको जानकारी दिए ।