काठमाण्डौः सरकारले वैशाख २५ गतेदेखि संघीय संसद्को बजेट अधिवेशन बोलाउने तयारी गरेको छ ।
कानून, न्याय तथा संसदीय मामिला मन्त्री पदम गिरीले वैशाख २५ या २६ गतेदेखि अधिवेशन बोलाउने तयारी रहेको जानकारी दिए । ‘वैशाख २५ या २६ गते अधिवेशन बोलाउने तयारी छ’, मन्त्री गिरीले बुधवार सञ्चारकर्मीसँगको कुराकानीमा भने ।
मन्त्रिपरिषद्को सिफारिशमा राष्ट्रपतिले संसद्को अधिवेशन आह्वान गर्ने संवैधानिक व्यवस्था छ । भोलि बिहीवार बस्ने मन्त्रिपरिषद् बैठकले अधिवेशन आह्वानका लागि सिफारिश गर्ने सरकारको तयारी गरेको छ ।
जेठ १५ गते वार्षिक बजेट ल्याउनुपर्ने संवैधानिक व्यवस्था छ । बजेटअघि संसद्मा राष्ट्रपतिले सरकारका नीति तथा कार्यक्रम पेश गर्ने बजेट अधिवेशनको कार्यसूची रहन्छ । संसद्मा प्रिबजेट छलफल भने सम्पन्न भइसकेको छ ।
सरकारले बजेट अधिवेशनको तयारी गर्दैगर्दा कांग्रेसले सहकारीको मुद्दा संसद्मा चर्काउने तयारी गरेको छ।सहकारी ठगीमा गृहमन्त्री रवि लामिछानेको संलग्नता रहेको दाबीसहित कांग्रेसले संसदीय छानबिन समितिको माग गरिरहेको छ ।
कांग्रेसले संसद्मा विरोध चर्काएपछि सरकारले वैशाख २ गते हिउँदे अधिवेशन अन्त्य गरेको थियो ।