काठमाण्डौः नेपाल प्रज्ञा प्रतिष्ठानका कुलपति गङ्गाप्रसाद उप्रेतीले साहित्यकार खिमानन्द आचार्यद्वारा लिखित विभिन्न विधाका चार कृतिको आज आयोजित कार्यक्रममा लोकार्पण गर्नुभएको छ ।
‘डिभर्ना–काठमाडौँ समाज’ द्वारा आयोजित कार्यक्रममा आचार्यको कवितासङ्ग्रह ‘आस्थाका प्रतिबिम्बनहरू’, कथासङ्ग्रह ‘पागल बस्ती’, लघुकथासङ्ग्रह ‘पश्चाताप’ र गीतिसङ्ग्रह ‘मनका तरङ्ग’ को विमोचन गरिएको हो । विगतमा गोरखापत्र संस्थानका प्रशासकीय अधिकृत रहेका आचार्य संयुक्त राज्य अमेरिकामा केही वर्षको बसाइपछि साहित्यिक कोसोली लिएर हाल स्वदेश फर्कनुभएको हो ।
कुलपति उप्रेतीले स्रष्टा आचार्यले आफूले देखे भोगेका सङ्घर्ष र अनुभवलाई सिर्जनामा उतारेर राष्ट्रलाई गुन लगाएको बताउनुभयो । समीक्षकहरूले आचार्यका कृतिमा देशप्रेम, मानवीय चेतना, विकृति र विसङ्गति विरुद्धका सन्देश र समसामयिकता पाइएको टिप्पणी गरेका थिए । आचार्यका कृतिहरूमाथि साहित्यकार एवं समालोचकहरू डा मोदनाथ प्रश्रित, विष्णु प्रभात, डा राजाराम सुवेदी र श्रीओम श्रेष्ठ ‘रोदन’ ले समीक्षा गर्नुभएको थियो ।
