काठमाण्डौः नेपाल पत्रकार महासंघका केन्द्रीय अध्यक्ष गोविन्द आचार्य र पत्रकार कृष्ण आचार्यलाई पितृशोक परेको छ । दुवै पत्रकारका पिता यामप्रसाद शर्माको ६८ वर्षको उमेरमा सोमबार विहान तीन बजे काठमाडौंको कीर्तिपुरस्थित निवासमा निधन भएको छ । स्वर्गिय यामप्रसाद शर्माको पार्थीव शरीरको विहान सात बजे पशुपति आर्यघाटमा दाहसंस्कार गरिएको छ ।
पार्थीव शरीरमा पूर्वप्रधानमन्त्रीद्वय पुष्पकमल दाहाल ‘प्रचण्ड’ र डा. बाबुराम भट्टराई सहित प्रतिनिधिसभाका सभामुख कृष्णबहादुर महरा लगायत विभिन्न राजनीति दलका नेताहरु र नेपाल पत्रकार महासंघका पदाधिकारी, केन्द्रीय सदस्यहरु एवं पूर्वपदाधिकारीहरु लगायत पत्रकारहरुले श्रद्धाञ्जली दिएका थिए ।
स्वर्गीय शर्माका श्रीमती, दुई छोरा र एक छोरी हुनुहुन्छ । अध्यक्ष आचार्य स्वर्गीय शर्माका जेठा छोरा हुनुहुन्छ । स्वर्गीय शर्माप्रति नेपाल पत्रकार महांसंघका महासचिव रमेश बिष्ट लगायतका विभिन्न ब्यक्तित्वहरूले शोक बिज्ञप्ती जारी गरी श्रद्धाञ्जली अर्पण गरेका छन् ।
