काठमाडौंः आगामी आर्थिक वर्षको बजेटमाथि उठेका सवालको आज मन्त्रीहरुले जवाफ दिने भएका छन् ।
संघीय संसदको प्रतिनिधिसभा बैठकमा सांसदहरूले उठाएका प्रश्नको मन्त्रीहरुले जवाफ दिने कार्यतालिका रहेको छ । बिहान एघार बजे बैठक बोलाइएको छ। १५ जेठमा अर्थमन्त्री युवराज खतिवडाले प्रस्तुत गरेको आगामी आर्थिक वर्षको बजेटमाथि संसदमा छलफल भइरहेको छ।
१८ जेठबाट सांसदहरुले मन्त्रालयगत रुपमा बजेटबारे छलफल गरिरहेका छन् । लगातार तीन दिन विषयगत बजेटमाथि सांसदहरुले छलफल गरेका थिए। आज भने सांसदहरुले बजेटबारे उठाएको प्रश्नको जवाफ मन्त्रीहरुले दिदैंछन् ।
संसदको सम्भावित कार्यसूचीअनुसार, सबै मन्त्रीले सांसदहरुलाई जवाफ दिनेछन् । यसपछि विनियोजन विधेयकमा खर्च कटौती गरियोस् भनी २६ सांसदहरुले राखेको प्रस्ताव निर्णयार्थ प्रस्तुत गरिनेछ ।
प्रमुख प्रतिपक्ष दलका सांसदहरुले राखेको प्रस्ताव निणयार्थ प्रस्तुत गरेपछि अर्थमन्त्री डा. युवराज खतिवडाले विनियोजन विधेयक निर्णयार्थ प्रस्तुत गर्नु हुनेछ ।
