काठमाडौं : महिला टी ट्वान्टी चारदेशीय शृंखलामा नेपाल घरेलु टोली हङकङसँग पराजित भएको छ। सिरिजको आफ्नो दोस्रो खेलमा नेपालले हङकङसँग ९ विकेटको हार ब्यहोरेको हो।
योसँगै नेपालले लगातार दुई खेलमा पराजय हुँदा शृंखलाबाट बाहिरिएको छ। नेपालले अब समूह चरणको अन्तिम खेलमा जापानसँग खेल्नेछ।
नेपालले प्रस्तुत गरेको ५७ रनको सामान्य लक्ष्य हङकङले ९ ओभरमा मात्र १ विकेट गुमाएर पूरा गर्यो। यसअघि, टस जितेर पहिले ब्याटिङ गरेको नेपालले १८ ओभरमा अलआउट हुँदै मात्र ५६ रन बनाउन सक्यो।
नेपालका लागि रुबिना क्षेत्रीले २५ रन बनाउनुबाहेक अन्यको प्रदर्शन निरीह रह्यो। नेपालका अन्य कुनै ब्याट्सवुमनले दोहोरो अंकको स्कोर छुन सकेनन्।
ओपनरद्वय पूजा महतो ४ र सीता रानामगर ९ रनमा आउट भएको खेलमा सम्झना खड्का १ रनमा पोविलियन फर्किएका थिए।
कप्तान इन्दु वर्मा र काजल श्रेष्ठ शून्य रनमा आउट हुँदा उपकप्तान बिन्दु रावल र कन्चन श्रेष्ठ १ रनमा र अश्मिना कर्मचार्य शून्य रनमा पोविलियन फर्किएका थिए।
हङकङकी इकरा सहरले सर्वाधिक ३ विकेट लिइन्। सुचिथा बेन्कटेशले २ विकेट लिएको खेलमा बेट्टी चान, मारिको हिल र केनी चानले समान एक–एक विकेट हात पारेका थिए। नेपाल पहिलो खेलमा तान्जानियासँग २७ रनले पराजित भएको थियो।
