काठमाडौँः प्रधानमन्त्री पुष्पकमल दाहाल प्रचण्डले सामाजिक सुरक्षा कोषको प्रभावकारिता अभिवृद्धिमा गम्भीर भएर लाग्ने बताउनुभएको छ ।
छैठौँ सामाजिक सुरक्षा दिवसका अवसरमा आज काठमाडौँमा आयोजित कार्यक्रममा प्रधानमन्त्री प्रचण्डले समाजवाद उन्मुख राज्यको परिकल्पनालाई साकार पार्न सामाजिक सुरक्षा कार्यक्रम कार्यान्वयनमा आफु गम्भीर भएर लाग्ने बताउनुभयो ।
प्रधानमन्त्री प्रचण्डले हालसम्म ५ लाख श्रमिकहरू सामाजिक सुरक्षा कोषमा आबद्ध भइसकेको भन्दै विदेशमा रहेका र अनौपचारिक क्षेत्रका सम्पूर्ण श्रमिक र रोजगारदाताहरूलाई आबद्धताका लागि आग्रह गर्नुभयो ।
प्रधानमन्त्री प्रचण्डले आफ्नै निर्देशन र पहलमा वैदेशिक रोजगारीमा जाने श्रमिकको सामाजिक सुरक्षाको शुरुवात गरिएको स्मरण गर्नुहुँदै सरल र सहज रुपमा सुविधा उपलब्ध गराउन कोषको व्यवस्थापकीय पक्षलाई सुदृढ तुल्याउन निर्देशन दिनुभयो ।
प्रधानमन्त्री प्रचण्डले संघीय लोकतान्त्रिक गणतन्त्रको मर्मअनुरूप सामाजिक सुरक्षालाई संघ वा प्रदेशको मात्र नभई स्थानीय तहको समेत दायित्वको रुपमा स्थानीय तहमा रहेका अनौपचारिक क्षेत्रका श्रमिकहरूलाई सामाजिक सुरक्षा कोषमा समेट्नुपर्नेमा जोड दिनुभयो ।
फरक प्रसङ्गमा प्रधानमन्त्री प्रचण्डले वर्तमान व्यवस्थालाई कमजोर पार्न चलखेल भइरहेको भन्दै इतिहास अग्रगमनतर्फ जाने भएकाले परिवर्तनका वाहक राजनीतिक दल, नागरिक समाज, बुद्धिजीवी, निजी क्षेत्र र सार्वजनिक क्षेत्रका व्यक्ति रहेसम्म इतिहास पछाडि नफर्किने बताउनुभयो ।
कार्यक्रममा श्रम रोजगार तथा सामाजिक सुरक्षा मन्त्री शरतसिँह भण्डारीले अस्थायी र करार सेवामा कार्यरत कर्मचारीलाई सामाजिक सुरक्षा कोषमा आबद्ध गर्न प्रक्रिया अघि बढाइएको बताउनुभयो ।
मन्त्री भण्डारीले श्रम ऐनले तोकेबमोजिम सामाजिक सुरक्षा कोष कार्यक्रमलाई अगाडी बढाउन र कोषमा प्राप्त रकमको परिचालन उत्पादन र रोजगारीका क्षेत्रमा गरिने बताउनुभयो ।
कार्यक्रममा सामाजिक सुरक्षा कोषका कार्यकारी निर्देशक कविराज अधिकारीले कोषको उपलब्धि र आगामी योजनाबारे प्रकाश पार्न पार्नुभयो ।
कार्यक्रममा संयुक्त टे«ड युनियन समन्वय केन्द्रका अध्यक्ष विनोद श्रेष्ठले कानूनी रुपमा मात्र नभई व्यवहारिक रुपमा श्रमिकका मुद्धाहरुको सम्बोधन हुने गरी कोषको व्यवस्थापन गर्नुपर्नेमा जोड दिनुभयो ।
कोषका अनुसार हाल १८ हजार ४ सय ३९ रोजगारदाता र नौ लाख २८ हजार ४ सय ५३ योगदानकर्ता कोषमा आबद्ध छन् । जसमा औपचारिकतर्फ चार लाख ६१ हजार ७ सय ९६ जना, वैदेशिक रोजगारीतर्फ चार लाख ६६ हजार ६ सय २२ जना, स्वरोजगारमा ३२ जना र अनौपचारिकतर्फ तीन जना आबद्ध छन् । यस अवधिसम्म कोषमा ५१ अर्ब २९ करोड रुपियाँ सङ्कलन भएको छ ।
कोषबाट औषधी उपचार, स्वास्थ्य तथा मातृत्व योजनातर्फ ७६ करोड १२ लाख, दुर्घटना तथा अशक्तता सुरक्षा दाबी रकम करोड ७५ लाख र अवकाश दाबी रकम पाँच अर्ब ४८ करोड, ९६ लाख रुपैयाँ रहेको छ । यस्तै आश्रित परिवार सुरक्षा दाबी रकम १० करोड ९६ लाख रहेको छ ।
