काठमाण्डौंः सत्तारूढ नेपाल कम्युनिष्ट पार्टी नेकपाका राष्ट्रिय सभा सदस्य तथा पूर्वमन्त्री दीनानाथ शर्माले भारतले सगौरव नेपाललाई दार्जिलिङ फिर्ता दिनुपर्ने बताएका छन्।
राष्ट्रिय सभा बैठकमा बिहीबार लिम्पियाधुरासहितको नक्सा संविधानको निसान छापमा राख्ने संविधान संशोधन विधेयक पारित गर्न बसेको शर्माले अंग्रेजले हडपेको नेपालको दार्जिलिङलगायत जमिन तपाईंहरूको नासो हो भन्दै भारतले सगौरव फिर्ता गर्नुपर्ने बताए।
‘यदि भारतले नेपाललाई असल मित्र ठान्छ भने अंग्रेजले लुटेको जमिन भारतबाट अंग्रेज भागिसकेपछि फिर्ता गर्नुपर्छ,’ शर्माले भने, ‘भारतले सगौरव हामीलाई दार्जिलिङ फिर्ता गरिदिनुपर्छ। अंग्रेजले लुटेको यो तपाईंहरूको नासो हो भनेर काँगडासम्मको जमिन फिर्ता गर्नुपर्छ।’
अंग्रेजले लुटेको जमिन अंग्रेज भारतबाट भागिसकेपछि भारतले नेपाललाई फिर्ता लिनुस् भन्नुपर्ने उनको तर्क छ।‘तर हामीले ती भूमि माग गरेका छैनौं,’ उनले भने।
नेपालले मित्र ठानेर भारतलाई कालापानीलगायत ठाउँमा पहिले चेकपोस्ट राख्न दिएको उनले बताए। शर्माले राष्ट्रियताका पक्षमा सबै एकढिक्का भएर जमिन फिर्ता लिनुपर्ने बताएका छन ।
