काठमाण्डौं : प्रधानमन्त्री केपी शर्मा ओलीले नेपालमा कोरोना भाइरस (कोभिड-१९) संक्रमण साउन अन्त्यतिर उच्च विन्दुमा पुग्ने विश्लेषण गरेका छन् ।
राष्ट्रिय सभाको छैटौं अधिवेशन बैठकमा बोल्दै प्रधानमन्त्री ओलीले आगामी साउनपछि कोरोना संक्रमणको ग्राफ विस्तारै ओरालो लाग्ने भन्दै उनले भने, ‘दशैं तिहार र छठ जस्ता चाडहरु आउँदैछन् । यो चाड सधैँ रमाइलो हुन्थ्यो । यसपटक फेरि संक्रमण बढाउँछ भन्ने अवस्था छ । यदि यसले हाम्रो ग्राफ बढाइदियो भने उँधो झर्दै गरेको ग्राफ मंसिरमा फेरि अलिकति मास्तिर जान सक्छ ।’
मंसिर अन्त्यबाट कोरोना ओरालो लाग्ने भन्दै प्रधानमन्त्री ओलीले, ‘फाल्गुनको महिना सम्भवत यस्को नियन्त्रणको महिना हुन्छ ।’ तर संक्रमितहरुलाई सहज रुपमा आउन दिन नहुने र बाहिरबाट आउनेहरुलाई क्वारेन्टिनमा राख्नुपर्ने बताए ।
