काठमाण्डौः राष्ट्रपति रामचन्द्र पौडेलले नागरिकले तिरेको कर कहाँ, कसरी खर्च भइरहेको छ भनेर जान्न पाउनुपर्ने बताउनभएको छ ।
राष्ट्रिय सूचना आयोगको १७औँ स्थापना दिवसका अवसरमा राष्ट्रपति भवन शीतल निवासमा आज भएको समारोहलाई सम्बोधन गर्दै उहाँले सरकारले नागरिकको हितमा काम गर्नुपर्ने र नागरिकले आफूले तिरेको कर कहाँ, कसरी खर्च भइरहेको छ भनेर जान्न पाउने उनीहरूको स्वाभाविक हक पनि भएको उल्लेख गर्नुभयो ।
कार्यक्रममा उहाँले सूचनाको हक लोकतन्त्रप्रति नागरिकको भरोसा जागृत गराउने उपयुक्त औजार भएको पनि बताउनुभयो । शासन प्रणालीलाई पारदर्शी तथा जवाफदेही बनाउने, बेथिति अन्त्य गर्ने, सुशासन कायम गर्ने, सेवा प्रवाह अभिवृद्धि गर्ने र यही व्यवस्थामा मात्र मेरो भविष्य सुरक्षित हुन्छ भनेर लोकतन्त्रप्रति नागरिकको भरोसा जागृत गराउने उपयुक्त औजार नै सूचनाको हक भएको उहाँको भनाई छ ।
सूचनाको हक स्थापित गर्न आयोगले सीमित साधनस्रोतबाट पनि कानुनको प्रभावकारी कार्यान्वयनका लागि जिम्मेवार भएर काम गरिरहेको राष्ट्रपति पौडेलको भनाई छ । उहाँले सूचनाको हकको थप प्रभावकारी कार्यान्वयनका लागि सबै सरोकारवाला निकाय जिम्मेवार हुनुपर्नेमा पनि जोड दिनुभएको छ ।
