सदाबहार खबरको रफ्तार ....
असार २९, २०८१ शनिबार
July 13, 2024
होमपेज
राजनीति बिचार अन्तरबार्ता स्वास्थ्य शिक्षा अर्थ/बजार खेलकुद अन्तराष्ट्रिय

विदेशमा रहेका नेपालीको नोट मात्र होइन, भोट पनि चल्नुपर्छ : नैनसिंह महर

२०८१ असार १४, शुक्रबार
शेयर गर्नुहोस:
फन्ट परिवर्तन गर्नुहोस:

काठमाडौंः नेपाली कांग्रेसका केन्द्रीय सदस्य नैनसिंह महरले विदेशमा रहेका नेपालीले पठाएको नोट मात्र नभएर उनीहरूलाई मतदानको अधिकार पनि दिइनुपर्ने बताएका छन्।

कतारको राजधानी दोहामा नेपाली जनसम्पर्क समितिको १७औं स्थापना दिवस अवसरमा आयोजित कार्यक्रमलाई सम्बोधन गर्दै नेता महरले विदेशमा रहेका नेपालीले पनि मताधिकारको सदुपयोग गर्न पाउनुपर्ने बताएका हुन्।

‘विदेशमा रहेका नेपालीहरूले पठाइरहेको रेमिट्यान्सले देश चलिरहेको छ। अत: तपाईंहरूलाई राज्यले सम्मान गर्न सक्नुपर्छ। मुलुकको आर्थिक समृद्धि र थुप्रै परिवर्तनमा तपाईंहरूको पनि ठूलो भूमिका छ। तपाईंहरूलाई मताधिकार गर्न राज्यलाई दबाब दिन तयार छु। म तपाईंहरूकै साथमा छु,’ उनले भने।

सरकारले विभिन्न मुलुकसँगको श्रम सम्झौतालाई पनि प्रभावकारी बनाउनुपर्ने उनले बताए। ‘विदेशमा रहेका नेपाली श्रमिकको सुख-सुविधा, सामाजिक सुरक्षालगायत विषयमा सरकारले श्रम सम्झौताको नीति अवलम्बन गर्नुपर्छ,’ उनले भने।

नेपालमा रेमिट्यान्सको सही सदुपयोग हुन नसकेको र विदेशमा रहेर पैसा पठाउने नेपालीको सरकारले उचित सम्मान गर्न नसकेको उनले औंल्याए। वैदेशिक रोजगारीमा गएका आफन्तको शिक्षा र स्वास्थ्यमा पनि सरकार गम्भीर हुनुपर्ने उनको सुझाव छ।

‘अहिले विश्व साँघुरो घर जस्तो भइसक्यो। नवउदारवादको अवस्थामा हामी आप्रवासनलाई रोक्न सक्दैनौं। मान्छेमा राम्रो सुविधा र सहुलियत प्राप्तिको आकांक्षा हुन्छ। गुणस्तरीय शिक्षा र स्वास्थ्य प्राप्तिको अभिलासा हुन्छ। असीमित आकांक्षा पूर्तिका लागि मानिस एक देशबाट अर्को देशसम्म पुग्नुलाई नराम्रो मान्न सकिन्न। तर, नेपालका नागरिक एसियालगायत मुलुकमा जीविकोपार्जनकै लागि पुग्ने गरेका छन्। यो दुखद कुरा हो। यस विषयमा राज्य गम्भीर हुनुपर्छ,’ नेता महरले भने।

नेपालमै रोजगारीका अवसर सिर्जना गर्ने सके ठूलो जनशक्ति स्वदेशमै रोक्न सकिने उनले बताए। युवा पौरख स्वदेशमै खर्चिए मात्र मुलुक निर्माण हुने महरको धारणा छ।

‘उमेर हुँदा विदेशमा पसिना बगाउने र असक्त हुँदा स्वदेश फर्किएर देश निर्माण गर्न सकिँदैन। त्यसैले राज्यले युवालाई विदेश पठाएर रेमिट्यान्समा रमाउने होइन, स्वेदेशमै श्रम र सिपको सदुपयोग गरेर युवाबाट उत्पादित वस्तु विदेश निर्यात गरेर डलर कमाउनुपर्छ,’ महरले भने।

कतारसँग २००५ मा श्रम सम्झौता भएको स्मरण गर्दै महरले अहिले यहाँ पनि ठूलो जनशक्ति कार्यरत रहेको बताए। सरकारले विदेशी लगानी नेपालमा अपेक्षित रुपमा भित्र्याउन नसकिरहेको बताउँदै महरले विदेशमा रहेका नेपाली नागरिक पनि अवैतनिक राजदूत हुने हुँदा नेपालमा लगानी भित्र्याउन सबैले सक्रिय भूमिका वहन गर्नुपर्नेमा जोड दिए।

विदेशमा रहेका नेपाली र असल भाव भएका नेता एकजुट भएर काम गरेमा समृद्ध नेपाल निर्माण गर्न धेरै समय नलाग्ने महरको भनाइ छ। ‘राणा र राजाले धिलथिलो पारेको मुलुक अहिले समृद्धिमा निकै अगाडि बढेको छ। तर, अपेक्षित रूपमा काम हुन सकेको छैन। सबै नेता, पत्रकार, सामाजिक अभियन्ता, कर्मचारी भ्रष्ट छैनन्। हामीले असल मान्छेलाई चिन्न सक्नुपर्छ। त्यसैले स्वदेश र विदेशमा भएका नेपाली एकजुट भएर समृद्धिको यात्रामा अगाडि बढ्यौं भने धेरै गाह्रो छैन,’ उनले भने।

बिपीले ‘मेरो जस्तै आर्थिक अवस्था भएको परिवार १५ वर्षभित्र बनाउन चाहन्छु’ भनेको स्मरण गर्दै महरले इमानदार भएर नेताहरूले काम गरे बिपीको सपना पूरा हुन पाँच वर्ष मात्रै लाग्ने बताए। यसका लागि सबै राजनीतिक दल र नेताहरू सच्चिन आवश्यक रहेको उनको धारणा छ।

फरक प्रसंगमा नेता महरले हामी नष्ट हुन्छौं तर भ्रष्ट हुँदैनौं भन्दै राजनीतिमा आएका नयाँ राजनीतिक दलको अवस्था कन्तिविजोगपूर्ण रहेको बताए। उनीहरू आउँदा नै भ्रष्ट बनेर आएको र छोटो समयमै नष्ट हुने बाटोमा रहेको महरको टिप्पणी छ।

यो खबर पढेर तपाईलाई कस्तो महसुस भयो ?

तपाइको प्रतिक्रिया राख्नुहोस्

सम्बन्धित समाचार

राजनीतिक समीकरण फेरिँदा माओवादीलाई सबैभन्दा धेरै क्षति लुम्बिनीमा

देउवा र ओलीसहितका शिर्ष नेता शीतल निवासमा

समृद्धिका लागि राजनीतिक नेतृत्वलाई सकारात्मक दबाब दिन जरुरी : इश्वर पोखरेल

सरकारमा दाबी पेश गर्न देउवा र ओली हस्ताक्षर गरेर तयारी अवस्थामा

देश र जनताको समस्या समाधान हुनुपर्छ : सांसद सुवाल

राजनीतिक अस्थिरताले समस्या समाधान हुँदैन : सांसद केसी

प्रधानमन्त्रीले आत्मसमीक्षा गर्नुपर्छ : सांसद यादव

दुई पार्टीबीचको सहमतिमा आशङ्का छः उपप्रधानमन्त्री लामिछाने

मेटमणिको प्रचण्डलाई सुझाव- देउवासँग सम्बन्ध नबिगार्नु होला, चार महिनापछि तपाइँ नै आउने हो

गृहमन्त्रीले सुशासनका कुरा गरेर संसदमा झुटो बोल्नुभयो- ज्ञानेन्द्र शाही

प्रधानमन्त्रीलाई विश्वासको मत दिने रास्वपा संसदिय दलको निर्णय

राजनीतिक स्थायित्वका लागि नयाँ समीकरण