काठमाण्डौः तामसालिङ पार्टी नेपालले सिंगो देश र नेपाली कम्युनिष्ट आन्दोलन गम्भीर र जटिल मोडमा पुगेको भन्दै माक्सबाद, लेनिनबाद, माओबाद हुँदै बैज्ञानिक समाजबादमा पुग्न अपिल गरेको छ ।
बुधबार साँझ राजधानीका विभिन्न स्थानमा फ्यालिएका पर्चामा उक्त पार्टीले सबैखाले उत्पीडन र नेपाली जनताको सार्वभौम अधिकार सम्पन्न गर्न जातिय मुक्ति बिना बर्गिय मुक्ति सम्भब छैन भन्दै पर्चा मार्फत अपिल गरेको हो ।
नेतृत्व नखुलाइ फालिएको उक्त अपिलमा उत्पिडित जाती र वर्गको फ्यूजनले मात्र नेपालमा क्रान्ति सम्भब छ भन्दै विभिन्न नाराहरू समेत पर्चामा उल्लेख गरिएको छ । पर्चामा वर्तमान सरकार पहिचान र संघियता बिरोधी भएको आरोप समेत लगाइएको छ ।
तामसालिङ पार्टी नेपाल केन्द्रिय समिति- २०७६ को नाममा जारी गरिएको पर्चामा पहिचान सहितको संघियता लागु गर्न अपिल गरिएको छ भने सबै जाति र वर्गको अधिकार सुनिश्चित हुने केन्द्रिय सरकार गठन गर्न मुख्य नाराहरू लेखिएको छ ।
