पत्रकार: तपाईं अमेरिकामा हुँदा नेपालमा अविरल वर्षा भयो, समयमै सरकारले उद्धार गरेन भन्ने गुनासा छन्। जनताहरू नेपालमा सरकार नै छैन भन्छन्, भ्रमण छोट्याएर तपाईं किन स्वदेश फर्कनु भएन?
प्रधानमन्त्री : प्रश्न पुग्यो। म फर्किएर आएँ, ठिक छ।
पत्रकार: प्रधानमन्त्रीज्यू, विपद्का बेला सरकारको भूमिका देखिएन भन्ने छ, के भन्नुहुन्छ?
प्रधानमन्त्री: विरोधका लागि विरोध होला। सरकारले गर्नेसम्मको प्रयास गर्यो। तत्काल बैठक गरेर सेना, प्रहरी परिचालन गरेर उद्धार गर्यो। अब बाढी आउने कुरालाई त रोक्न सकिँदैनथ्यो। उद्धार गर्ने र राहत पुर्याउने कुरा हो। पूर्वसूचना गरेर पहिरो जाँदैन। पहिरो गएपछि क्षति पुर्याउने नै भयो। त्यसमा सरकारले तदारूकताका साथ उद्धार कार्य र राहत कार्य पुर्याउने हो, त्यो पुर्याएको छ भन्ने मलाई लाग्छ। मैले बाहिरै हुँदा पनि यस विषयमा जानकारी लिँदै आएको छु। निर्देश गर्दै आएको छु। मैले जानकारी पाएअनुसार आफ्नो बुताअनुसार गरेको छ। संवेदनशील बेलामा सबै मिलेर चल्नु राम्रो हुन्छ, विरोधका लागि विरोध गर्ने होइन।
पत्रकार: तपाईं स्वदेश आइसक्नुभयो अब के हुन्छ सरकारको भूमिका?
प्रधानमन्त्री : अझ प्रभावकारी ढंगले उद्धार, राहत र पुनर्स्थापनाका कामहरू अघि बढ्छ।
पत्रकार: संयुक्त राष्ट्रसंघमा तपाईंको सम्बोधनले मुलुकलाई के अर्थ राख्छ?
प्रधानमन्त्री : म कुनै भैंसी दुहुन गएर दूध लिएर आएँ भनेजस्तो होइन। हाम्रा विचार, समस्याहरू त्यहाँ राख्न गएको हो, राखियो। यी समस्याहरू एउटा देशका मात्र होइन, सबैका हुन्। सबै देश मिलेर समाधान गर्नुपर्छ भन्ने कुरा भयो। अल्पविकसित देशहरूले क्षति र मार सहनु परेको छ, त्यसमा विश्वसमुदायको ध्यान जानुपर्छ।
पत्रकार: विपद आउँदैछ भनेर सरकारी संयन्त्रले नै ५६ जिल्लामा रेड अलर्ट गरेको थियो, सरकारले पूर्वतयारी किन गरेन?
प्रधानमन्त्री : एउटा कुरा तपाईंलाई सोध्न चाहन्छु- रेड अलर्ट भनेर पूर्वानुमान गरेको छ हो, तर कहाँ-कहाँ पहिरो जान्छ त भनेको थिएन। पहिरो गएपछि न थाहा भयो। काठमाडौंमा यति डुबान हुने गरी वर्षा होला भन्ने कल्पना पनि थिएन, यस्तो कुरालाई वस्तुपरक ढंगले लिनुपर्छ।
पत्रकार: मेयर बालेन शाहले खोला किनारामा संरचना बनाउँदा डुबान भयो भन्दै आएका छन्, के बालेनका कुरा ठिक हो भनेर नागरिकले बुझ्नुपर्ने हो?
प्रधानमन्त्री ओली: हा हा राम्रो प्रश्न, धन्यवाद।
