काठमाडौँ, १५ असोज : वरिष्ठ पत्रकार एवं साहित्यकार विजय चालिसेको वैदिक साहित्यमा आधारित उपन्यास ‘युगसन्धि’ सार्वजनिक भएको छ ।
राजधानीमा आज आयोजित कार्यक्रममा नेपालमै वेदमा पहिलो विद्यावारिधि गर्नुहुने प्रा डा ऋषिराम पोखरेललगायत साहित्यकार र गोकर्णेश्वर नगरपालिकाका नगर प्रमुख दीपककुमार रिसालले पुस्तक सार्वजनिक गर्नुभएको हो । परिचय पब्लिकेशन प्रालिले प्रकाशन गरेको पुस्तक ३८ सर्ग र २४८ पृष्ठ छ । पुस्तकको मूल्य रु पाँच सय ५० तोकिएको छ ।
पुस्तक लोकार्पण समारोहलाई सम्बोधन गर्नुहुँदै पोखरेलले वेद कसैले लेखेको नभई ऋषिमुनिले ध्यानरत अवस्थामा देखेकाले नै यसको लेखक नभएको बताउनुभयो । ऋषिमुनिले ध्यान दृष्टिले देखेको वेदिक साहित्यका विषयमा सृजनशीलता थपेर लेखकले वैदिक दर्शनप्रति पाठकलाई रुचि जगाउने विश्वास व्यक्त गर्नुभयो ।
गोकर्णेश्वर नगरपालिकाका नगर प्रमुख रिसालले नगरपालिकामा पहिलेदेखि नै साहित्यसेवी भएको उल्लेख गर्दै विजय चालिसेका कृतिले पनि नेपाली साहित्यमा महत्त्वपूर्ण योगदान दिने बताउनुभयो । नगरपालिकाले साहित्य सम्मेलनलगायत गतिविधिले साहित्यकारलाई प्रोत्साहन गरिरहेको उहाँको भनाइ थियो ।
पुस्तकमाथि समीक्षा गर्नुहुँदै प्रा डा ज्ञान पाण्डे र गोपीनाथ मैनालीले वैदिक साहित्यको सूक्ष्म विश्लेषणसहित लेखिएको उपन्यासले पाठकलाई नयाँ स्वाद दिने, वैदिक विषयलाई सरल रूपमा बुझाउन सहयोग गर्ने बताउनुभएको थियो । समीक्षक युवराज मैनालीले पुस्तकमा वैदिक युगको अवस्थाको विश्लेषण रहेको सुनाउनुभयो ।
लेखक चालिसेले वशिष्ठ ऋषिको वंशज भएकाले खोजी गर्दैै वैदिक साहित्यमा आधारित उपन्यासको जन्म भएको बताउनुभयो । उपन्यास लेख्न आफूले वैदिक साहित्यको सुक्ष्म रुपमा अध्ययन गरेको जानकारी गराउनुभयो ।
प्रकाशक संस्था परिचय पब्लिकेशन प्रालिका प्रमुख कार्यकारी अधिकृत भाष्कर ज्ञवालीले बाल साहित्यका १६० पुस्तक प्रकाशन गरेपछि कथा, उपन्यासलगायत पुस्तक प्रकाशन सुरु गरेको जानकारी दिनुभयो ।
