काठमाण्डौः नेपालका लागि अमेरिकी राजदूत र्याण्डी बेरीले नेपाल कुनै पनि देशको पक्षमा नभएको आफुले हेर्न चाहेको बताएका छन् ।
इन्टिच्युट फर इस्ट्राटेजिक एन्ड सोसियो इकोनोमिक रिसर्च (ISSR)ले शुक्रबार आयोजना गरेको ‘नेपालमा अमेरिकी कुटनीति’ विषयक अन्तरक्रियामा राजदूत बेरीले उक्त कुरा बताएका हुन् ।
नेपालमा अन्य मुलुकको हस्तक्षेप अमेरिकाको लागी स्विकार्य नहुने भन्दै राजदुत बेरीले अमेरिकाले अघि सारेको ईण्डोप्यासिफिक स्ट्राटेजी रणनीति नभई ईण्डोप्यासिफिक क्षेत्रका लागि अघि सारेको नीति भएको बताएका छन् ।
राजदूत बेरीले इण्डो प्यासिफिक क्षेत्रमा रहेका देशहरु खुला, स्वतन्त्र र सुरक्षित रहने वातावरण बनाउन इण्डो प्यासिफिक स्ट्राटेजी रणनीतिले सहयोग गर्ने उल्लेख गरे ।
साथै उनले संसारका सार्वभौम र साना सबै देशहरुले यस रणनीतिबाट फाइदा लिने बताउँदै नेपाल बलियो हुँदा अमेरिका समेत बलियो हुने र अमेरिका बलियो हुँदा नेपाल बलियो हुने विश्वासमा अमेरिका रहेको बताए ।
राजदूत बेरीका अनुसार ईण्डोप्यासिफिक रणनीतिमा साझेदारका रुपमा करिब ५० वटा देशहरु रहेको भन्दै उनले संसारका कुनै पनि देशलाई दबाब नदिने समेत बताए ।
नेपाल अमेरिकाको कुटनीतिक सम्बन्ध स्थापना भएको ७० वर्ष पुगेको बताँउदै राजदूत बेरीले नेपाललाई सदाझै मिलेनियम च्यालेञ्ज कर्पोरेशन (एमसीसी) अन्तर्गत ५० अर्ब रुपैयाँ सहयोग गर्न लागेको समेत बताएका थिए ।
चिनियाँ राष्ट्रपतिको आसन्न नेपाल भ्रमण पूर्व सत्तारूढ (नेकपा) र चिनियाँ कम्युनिस्ट पार्टीबीच ६ बुँदे लिखित सहमती भएसँगै अमेरिकी राजदुतले सक्रियता बढाएका हुन् ।
दुई दिन भित्र मात्रै उनले सत्तारूढ (नेकपा)का बिदेश विभाग प्रमुख एवं बरिष्ट नेता माधब कुमार नेपाल र प्रमुख प्रतिपक्ष दल काँग्रेसका सभापति शेर बहादुर देउवासँग दुई देशबीचको पारस्पारिक सम्बन्धका बिषयमा छुट्टाछुट्टै छलफल गरेका थिए ।
