काठमाण्डौः नेपाल क्रिकेट संघ (क्यान)को अध्यक्षमा चतुर बहादुर चन्द निर्वाचित भएका छन् । शनिबार सम्पन्न क्यानको चुनावमा विनयराज पाण्डेको समुहलाई पराजित गर्दै चन्दको समुह विजयी भएको हो ।
यसैगरी क्यानको उपाध्यक्षमा राजुबाबु श्रेष्ठले ४१, सचिवमा अशोक प्याकुरेलले ४२ र कोषध्यक्षमा रोशनबहादुर सिंहले ४५ मत प्राप्त गरी विजयी भएका छन् । विनयराज पाण्डेको समुहबाट प्रतिस्पर्धीहरू मिङमा देण्डु शेर्पाले १७, विनोद मैनालीले १५, उपेन्द्र भट्टराईले १२ मत प्राप्त गरेका छन् ।
यसैगरी चन्द समुहबाटै सदस्यहरुमा कैलाश विष्ट, अमितवीर पाण्डे, दुर्गाराज पाठक, वीरेन्द्र चन्द, माधवकुमार कर्माचार्य, सञ्जय सिंह, करन मल्हत्रा क्षेत्री, विक्रम विष्ट, ऋषि गौतम, जयन्ती भट्ट, पदमबहादुर खड्का, दाउद अन्सारी विजयी भएका छन् ।
१७ सदस्यका लागि सम्पन्न भएको निर्वाचनमा चन्दको पुरै प्यानल विजयी भएको हो । ५९ जना मतदाता रहेको क्यानमा चन्दले ४४ र पाण्डेले १५ मत प्राप्त गरेका थिए ।
