काठमाण्डौं : फ्रान्सको राजधानी पेरिसमा प्रहरी मुख्यालय परिसरमा छुरा प्रहारबाट ४ प्रहरी अधिकारीको मृत्यु भएको छ ।
प्रहरी मुख्यालयमा चक्कु बोकेका व्यक्ति बिहीबार स्थानीय समय अनुसार अपरान्ह १ बजे प्रवेश गरी प्रहरी अधिकारीहरुमाथि छुरा प्रहार गरेको स्थानिय सञ्चारमाध्यमहरूले जनाएका छन् ।
छुरा प्रहरा गर्ने व्यक्तिलाई नियन्त्रणमा लिने क्रममा प्रहरीको गोलि लागि निज व्यक्तिको घटनास्थलमै मृत्यु भएको बताइएको छ ।
फ्रान्सका प्रहरीले देशभरि अधिकारीहरूमाथि हिंसा बढिरहेको र फौजभित्र आत्महत्याको घटना बढिरहेको भन्दै हडताल गरेको एकदिन पछि यो घटना भएको हो ।
घटना पश्चात फ्रान्सका प्रधानमन्त्री तथा आन्तरिक मामिलामन्त्री घटनास्थलमा पुगेका थिए प्रहरीले बताएको छ ।
प्रहरी मुख्यालयमा आक्रमण गर्ने व्यक्ति मुख्यालयको प्रशासनिक विभागमा काम गर्ने कर्मचारी रहेको खुल्न आएको भएपनि आक्रमणको बारेमा थप अनुसन्धान भइरहेको स्थानीय प्रशासनले जनाएको छ ।
