सदाबहार खबरको रफ्तार ....
मंग्सिर ४, २०८३ शुक्रबार
November 20, 2026
होमपेज
राजनीति बिचार अन्तरबार्ता स्वास्थ्य शिक्षा अर्थ/बजार खेलकुद अन्तराष्ट्रिय ☰

६५ प्रतिशतसम्म बढी वर्षा हुने, २० लाखभन्दा बढी प्रभावित हुने

२०८२ जेठ १५, बिहिबार
शेयर गर्नुहोस:
फन्ट परिवर्तन गर्नुहोस: अ अ अ

यस वर्षको मनसुनमा नेपालभर औसतभन्दा बढी वर्षा हुने २० लाखभन्दा बढी मानिस प्रत्यक्ष रूपमा प्रभावित हुने अनुमान गरिएको छ । जल तथा मौसम विज्ञान विभागले बंगालको खाडीबाट मनसुनको सक्रियता शुरू भइसकेको जनाएको छ । विभागका अनुसार बंगालको खाडी, दक्षिण भारतको केरला, श्रीलंका, माल्दिभ्स आसपासको क्षेत्रमा मनसुन प्रवेश गरिसकेको छ र क्रमशः नेपालतर्फ विस्तार हुँदै छ । नेपालमा जेठ १९ गते सोमबारबाट मनसुन शुरू हुने प्रक्षेपण गरिएको छ ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार यस वर्ष मनसुनमा कम्तीमा पनि २० लाख मानिस प्रत्यक्ष रुपमा प्रभावित हुने खतरा छ । कर्णाली, गण्डकीका अधिकांश र लुम्बिनीको उत्तरी भागमा सरदरभन्दा ६५ प्रतिशतसम्म बढी वर्षा हुने सम्भावना रहेकोले लुम्बिनी प्रदेशकै बढी प्रभावित हुने अनुमान गरिएको छ । प्राधिकरणका अनुसार लुम्बिनी प्रदेशका १ लाख १९ हजार ८३० घरधुरीका ५ लाख २३ हजार ६५६ जना प्रभावित हुने अनुमान गरिएको छ । त्यसैगरी दोस्रोमा बागमती प्रदेशमा ७४ हजार घरधुरीका ३ लाख २७ हजार ३७६ जना र कोशी प्रदेशका ६३ हजार १२७ घरधुरीका २ लाख ७५ हजार ८६७ जना प्रभावित हुनसक्ने बताइएको छ ।
यस पटक सुदूरपश्चिमको ५२ हजार ११२ घरधुरीका २ लाख २७ हजार ७३० र मधेसका ५२ हजार ३३१ घरधुरीका २ लाख २८ हजार ६८७ र कर्णालीका २९ हजार १३२ घरधुरीका १ लाख २७ हजार ३०८ जना प्रभावित हुने पूर्वानुमान गरिएको छ ।

प्राधिकरणका अनुसार गत वर्षको जेठ २८ देखि असोज २६ गतेसम्मको अवधिमा ४ सय ९४ जनाको मृत्यु भएको थियो भने ६६ जना बेपत्ता र ५ सय ३२ जना घाइते भएका थिए । उक्त अवधीमा १२ लाखभन्दा बढी मानिस प्रभावित भएका थिए ।

मौसम विभागका अनुसार यो वर्ष देशका विभिन्न भूभागमा ३५ देखि ६५ प्रतिशत बढी वर्षा हुने अनुमान गरिएको छ । विभागका वरिष्ठ मौसमविद् विभूति पोख्रेलका अनुसार ५५ देखि ६५ प्रतिशत भूभागमा औसतभन्दा बढी वर्षा हुने अनुमान छ भने ३५ देखि ४५ प्रतिशत क्षेत्रमा पनि बढी पानी पर्ने सम्भावना देखिएको छ । त्यसैगरी तापक्रम पनि विगत वर्षको तुलनामा उच्च हुने अनुमान गरिएको छ । अधिकतम तापक्रम अधिकांश क्षेत्रमा सरदरभन्दा बढी हुने सम्भावना ५५ देखि ६५ प्रतिशत रहेको छ ।
विभागका वरिष्ठ मौसमविद् प्रतिभा मानन्धरले नेपालमा ८० प्रतिशत वर्षा मनसुन अवधिमै हुने भएकाले बाढी, पहिरो र डुबानजस्ता प्रकोपका लागि सतर्क रहन आग्रह गर्नुभयो । उहाँले भन्नुभयो– ‘१२ महिनामध्ये ४० प्रतिशत प्राकृतिक विपद् मनसुन समयमा हुने भएकाले जोखिम न्यूनीकरणका लागि सबै निकाय सतर्क रहनुपर्छ । समयमै पूर्वतयारी गरे विपद् न्यूनीकरणमा ठूलो योगदान पुग्छ ।’
विभागका अनुसार गत वर्षको तुलनामा यस वर्षको वर्षा दर उल्लेख्य वृद्धि हुने अनुमान छ । अघिल्लो वर्षको मनसुन अवधिमा १,३०३ मिलिमिटर वर्षा भएकोमा यो वर्ष औसत १,४७२ मिलिमिटर पुग्ने अपेक्षा गरिएको छ । गत वर्ष धेरै स्थानमा कम वर्षा भएको थियो भने काठमाडौं, वरपरका जिल्लाहरूमा अत्यधिक वर्षा मापन गरिएको थियो ।

विपद् जोखिम न्यूनीकरणमा राज्य संयन्त्रको तयारी
मनसुनजन्य जोखिम न्यूनीकरणका लागि सरकारले पूर्वतयारीलाई तीव्र बनाएको छ । राष्ट्रिय विपद् जोखिम न्यूनीकरण तथा व्यवस्थापन प्राधिकरणका प्रवक्ता रामबहादुर केसीका अनुसार विपद् प्रतिकार्यसम्बन्धी कार्ययोजना अन्तिम चरणमा पुगेको छ । विपद् पूर्वतयारी तथा प्रतिकार्य कमान्ड सेन्टर बनाएर तुरुन्तै उद्धार, राहत र पुनःस्थापनामा जुट्ने गरी कार्ययोजना बनाइएको र केही दिनभित्रै कार्ययोजना अन्तिम हुनेछ– केसीले भन्नुभयो ।

सुरक्षा निकायको तयारी
नेपाली सेनाका प्रवक्ता गौरवकुमार केसीले मनसुन अवधिभरका लागि उद्धार तथा राहत कार्यमा ३५ हजार जनशक्ति तयारी अवस्थामा राखिएको जानकारी दिनुभयो । उहाँले भन्नुभयो– ‘हामीले बाढी, पहिरो प्रभावित क्षेत्रमा खटिन सक्ने गरी आवश्यक औजारसहितका टोली तयारी अवस्थामा राखेका छौं । हेलिकोप्टरसहितका हवाई साधन पनि तयारी अवस्थामा राखिएको छ ।’
नेपाल प्रहरीका प्रवक्ता प्रहरी वरिष्ठ उपरीक्षक रमेश थापाले मनसुनजन्य विपद् व्यवस्थापनका लागि ३२ हजार प्रहरी जनशक्ति खटिन सक्ने गरी तयारी गरिएको बताउनुभयो । उहाँले भन्नुभयो– ‘हामीले विपद् पूर्वतयारी तालिमदेखि आपतकालीन उद्धार टोली गठन गरिसकेका छौं । आवश्यक ठाउँमा थप जनशक्ति खटाउने योजनामा छौं ।’
सशस्त्र प्रहरी बलका प्रवक्ता डीआईजी कालिदास धौवजीले १५ हजार जनशक्ति र १ हजार ५० थान उद्धार उपकरण तयारी अवस्थामा राखिएको जानकारी दिनुभयो । उहाँले भन्नुभयो– ‘मनसुनमा आउने विपद् व्यवस्थापनका लागि सशस्त्र प्रहरी सधैं अग्रमोर्चामा रहने छ । हेलिकोप्टर, विपद् व्यवस्थापनका उपकरणहरू तयारी अवस्थामा छन् ।’

गत वर्ष २ हजार १ सय ३६ मनसुनजन्य घटना भएका थिए । यसबाट ५ हजार ९ सय ३७ परिवार प्रभावित बनेको प्राधिकरणले जनाएकोे छ । गत वर्ष ३ सय ९७ स्थानमा बाढीले क्षति पु¥याएको थियो । जसमा ९० जनाको मृत्यु हुनुका साथै १८ जना बेपत्ता र ४५ जना घाइते भएका थिए । जसबाट २ हजार २ सय २७ परिवार प्रभावित भएका थिए । गत वर्षको मनसुन अवधिमा ९ सय ४३ स्थानमा पहिरो गएको थियो भने जसबाट ३ सय ४३ जनाको मृत्यु, ४८ जना बेपत्ता, २ सय ७६ जना घाइते र १ हजार ५ सय ६१ परिवार प्रत्यक्ष प्रभावित बनेका थिए ।
गत वर्ष भारी वर्षा भएको थियो । गत वर्ष ५ सय ३८ स्थानमा भारी वर्षा भएको तथ्यांक प्राधिकरणले जानकारी दिएको छ । जसबाट ९ जनाको मृत्यु भयो भने ३८ जना घाइते भएका थिए । भारी वर्षाबाट १ हजार ८ सय १४ परिवार प्रभावित भएको प्राधिकरणले बताएको छ । बाढी, पहिरो, चट्याङ, भारी वर्षाका कारण ४ सय ५९ वटा पहिरो, १ सय ४२ वटा बाढी, १ सय ६८ वटा भारी वर्षा र १ सय २३ वटा चट्याङका घटना भएका थिए ।

यसैबीच,सरकारले आगामी बैठकमार्फत मनसुनमा उद्धार, राहत र पुनःस्थापनाका लागि आवश्यक स्रोतसाधनको तयारी र तीनै तहका सरकार तथा सरोकार निकायको समन्वयसहितको विस्तृत कार्ययोजना पारित गर्ने तयारी गरेको छ ।
यस वर्षको मनसुन औसतभन्दा बढी हुने प्रक्षेपणसँगै जोखिम न्यूनीकरणका लागि तयारी अवस्थामा रहनुपर्ने देखिन्छ । बाढी, पहिरो, डुबानलगायतका जोखिम व्यवस्थापनमा राज्य संयन्त्रको सतर्कता र तीनै तहका सरकारबीचको समन्वय मत्वपूर्ण हुने देखिन्छ । जनसाधारणलाई सचेत रहनुका साथै सरकारी निकायको समयमै सक्रियता नै सम्भावित क्षतिको न्यूनीकरणको प्रमुख उपाय हुने विज्ञहरूको धारणा छ । नेपाल समाचारपत्र

यो खबर पढेर तपाईलाई कस्तो महसुस भयो ?

तपाइको प्रतिक्रिया राख्नुहोस्

सम्बन्धित समाचार

मलेसिया जाने श्रमिकसँग यसरी असुलियो दुई अर्ब

प्रधानमन्त्रीको भारत भ्रमण सफल बनाउन अन्तिम गृहकार्य

आरोहण प्रभावित हुँदा राजस्वबारे अन्योल

विकेन्द्रीकरण विस्तारको तयारीमा त्रिवि

एमालेको विशेष संकल्प : लोकतन्त्रको पुनर्बहालीदेखि पार्टी शुद्धीकरणसम्म

एमबीबीएसमा १० हजार ३२१ उत्तीर्ण, दुई हजार ७४५ सिटका लागि प्रतिस्पर्धा

ट्रम्प, सी र पुटिनबिच आज शिखर वार्ता हुँदै

दानबहादुरको मुद्दालाई अग्राधिकार

स्थानीय निर्वाचनसम्बन्धी एमालेको १३ बुँदे कार्ययोजना

बैंकमा पैसा थुप्रियो, मुद्दती निक्षेप घट्यो

शिक्षकको क्षमता विस्तार पढाउन जानुअघि तीन महिनाको तालिम अनिवार्य

कर तिर्नेलाई सम्मान, लगानीकर्तालाई अन्योल