काठमाण्डौः अर्घाखाँचीको सन्धिखर्क नगरपालिका वार्ड नम्बर ६ स्थित नरपानी घुम्तीमा बोलेरो जीप दुर्घटना भएको छ ।
दशै मनाउन कपिलबस्तुको कृष्णनगरबाट ९ जना यात्रु बोकेर सन्धिखर्कतर्फ जाँदै गरेको लङ्का यातायात प्रालिको बोलोरो जीप नरपानी र घुम्ती बिचमा पर्ने रातामाटा स्थित साङ्खोला भन्ने स्थानमा मध्यान्ह १२ बजे दुर्घटना भएको हो ।
उक्त दुर्घटनामा परि तीन जनाको घटनास्थलमै मृत्यु भएको छ । अन्य ६ जना घाइते भएका छन् । मृत्यु भएकाहरूको सनाखत हुन बाँकी रहेकोले पहिचान खुल्न सकेको छैन ।
घाइते ६ जना मध्य गम्भिर घाइते विरेन्द्र श्रेष्ठ, उमेश रेग्मी, अनिता खनाल र बिन्दु खनालको भैरहवा मेडिकल कलेजमा थप उपचारको लागी रिफर गरिएको छ ।
सामान्य घाइते सिला रेग्मी र दुधे बालक आदित्य रेग्मीको जिल्ला अस्पताल अर्घाखाँचीमा उपचार भईरहेको प्रहरीले जनाएको छ ।
लु १ छ ४३२९ नम्बरको बोलेरो जीप सडकबाट अन्दाजी ५ सय मिटर तल खसेको प्रहरीले जनाएको छ ।
