काठमाण्डौः प्रधानमन्त्री केपी शर्मा ओलीले चिनियाँ राष्ट्रपति सी जिनपिङको नेपाल भ्रमणका क्रममा उठाउने एजेण्डाबारे परामर्श गर्न बैठक आव्हान गरेका छन् ।
चिनियाँ राष्ट्रपतिले असोज २५ गते नेपाल भ्रमण गर्ने सुनिश्चित भएपछि प्रधानमन्त्री ओलीले प्रचलनअनुसार एजेण्डाको विषयमा व्यापक परामर्श गर्न उक्त बैठक डाकेका हुन् ।
राष्ट्रिय एजेण्डा तय गर्न प्रधानमन्त्री ओलीले बिहिबार पूर्व प्रधानमन्त्रीहरूसँग छलफल गर्न लागेको बालुवाटार स्रोतको दावी छ ।
उक्त छलफलका लागि बिहीबार बिहान ९ बजे पूर्वप्रधानमन्त्रीहरूलाई प्रधानमन्त्री निवासमा बोलाइएको छ । छलफलका लागि पूर्वप्रधानमन्त्रीहरू पुष्पकमल दाहाल प्रचण्ड, शेरबहादुर देउवा, माधवकुमार नेपाल, झलनाथ खनाल, बाबुराम भट्टराई, लोकेन्द्रबहादुर चन्द लगायतलाई निमन्त्रणा गरिएको छ।
प्रधानमन्त्री ओलीले पूर्वप्रधानमन्त्रीसँग प्रधानमन्त्री निवाश बालुवाटारमा हुने छलफलमा सीको दुइदिने राजकीय भ्रमण, समझदारीपत्रमा हस्ताक्षर र नेपालले उठाउने मुख्य एजेण्डाबारे छलफल हुने बताइएको छ ।
