काँक्रेविहार (सुर्खेत), ३१ साउनः लेखक तथा सामाजिक अभियन्ता डा नवराज केसीको दोस्रो कृति ‘स्वस्पर्श’ सार्वजनिक गरिएको छ । फाइनप्रिन्ट प्रकाशनले बजारमा ल्याएको उक्त पुस्तकको आज सुर्खेतमा विशेष समारोहबीच विमोचन गरिएको हो ।
लेखक डा केसीका अनुसार स्वस्पर्शमा जीवनका उतार–चढाव, आत्मसङ्घर्ष र सुख–खुसीको खोजीसँग सम्बन्धित विविध कथा समेटिएका छन् । पुस्तकले आशा, प्रेरणा र सकारात्मक सोचसहित जीवनलाई अगाडि बढाउन मार्गदर्शन गर्ने सन्देश बोकेको छ ।
उहाँले यो कृति प्रत्येक व्यक्तिको आत्मअन्वेषण र आत्मसाक्षात्कारतर्फको यात्रामा समर्पित रहेको बताउनुभयो । “ सङ्घर्षबीच जीवनलाई कसरी सबल र प्रेरणादायी बनाउन सकिन्छ भन्ने यथार्थपरक कथा, जीवनअनुभव र बुद्ध–विज्ञानसँग सम्बन्धित विचारहरू पुस्तकमा समावेश छन्”, लेखकले भन्नुभयो ।
कार्यक्रममा साहित्यकार सुविन भट्टराईले ‘स्वस्पर्श’ स्कूले उमेरदेखि वृद्धावस्थासम्मका सबै पाठकको मन छुने कृति भएको टिप्पणी गर्नुभयो ।
यसअघि डा केसीले पहिलो कृति ‘शून्यको मूल्य’ पाठकमाझ ल्याउनुभएको थियो ।
