काठमाण्डौ: चीनियाँ राष्ट्रपति सी जिनपिङ र प्रधानमन्त्री केपी शर्मा ओलीको उपस्थितिमा होटल सोल्टीमा भएको संयुक्त भेटवार्तामा विभिन्न क्षेत्रमा द्धिपक्षीय १७ वटा सम्झौता पत्रमा हस्ताक्षर भएको छ ।
वार्तामा नेपालको तर्फबाट प्रधानमन्त्री ओली, परराष्ट्रमन्त्री, गृहमन्त्री, उर्जामन्त्री, अर्थमन्त्री, मुख्यसचिव, प्रधानमन्त्रीका राजनीतिक सल्लाहकार लगायत तीन दर्जन प्रतिनिधीहरूको सहभागीता रहेको थियो ।
नेपाल र चीनबीच यातायात सञ्जालसम्बन्धी भौतिक पूर्वाधार, जलविद्युत, शिक्षा स्वास्थ्य लगायतका विभिन्न क्षेत्रमा उक्त सम्झौता भएका हुन् ।
सम्झौतामा रसुवागढी-काठमाडौं र तातोपानी-काठमाडौ सडक स्तरोन्नती, टोखा-छहरे सुरुङ मार्ग, मदन भण्डारी विश्व विद्यालय, कर्णाली करिडोर निर्माण लगायतका विषयहरू समेटिएका छन् ।
हस्ताक्षरपछि ती समझदारीपत्र दुवै देशका परराष्ट्रमन्त्री, अर्थसचिव, गृह, परराष्ट्रसचिव लगायत सम्बन्धित मन्त्रालयका सचिव एवं नेपालका लागि चिनियाँ राजदूतले आदानप्रदान पनि गरेका थिए ।
राष्ट्रपति विद्यादेवी भण्डारीको निमन्त्रणामा नेपालको दुइदिने राजकीय भ्रमणमा रहेका राष्ट्रपति सी आजै अपरान्ह स्वदेश फर्कने कार्यक्रम रहेको छ ।
