काठमाण्डौ : पाँचथर कारागारमा रोगी सुँगुरको मासु खाँदा ज्यान गुमाउने कैदीको संख्या ३ पुगेको छ ।
दशैको अवसरमा सुँगुरको मासु खाँदा बिरामी परेका पाँचथर फालेलुङ ६ का सुन्दर राईको झापाको बीएण्डसी अस्पतालमा उपचारको क्रममा आइतबार ज्यान गएको हो ।
गत असोज १९ गते राति कारागार भित्रै सुँगुरको मासु खाँदा गम्भिर बिरामी परेका अन्य चार जनामध्ये फालेलुङ गाउँपालिका ८ का २५ वर्षीय बुद्धि केरुङको जिल्ला अस्पतालमा असोज २० गते उपचारको क्रममा ज्यान गएको थियो ।
त्यसैगरी फिदीम नगरपालिका १० का ३४ वर्षीय जयप्रकाश जवेगुको उपचारको लागि झापातर्फ लैजाँदै गर्दा सोही दिन ज्यान गएको कारागारका प्रमुख सुरेन्द्र मुखियाले जनाएका छ्न् ।
मृतक सुन्दर राईको शव पोष्टमार्टम पछि सोमबार परिवारलाई जिम्मा लगाइने पाँचथर प्रहरीले जनाएको छ ।
आइतबार ज्यान गुमाएका राई विगत ६ बर्षदेखि र केरुङ ३ वर्ष अघिदेखि जबरजस्ती करणी मुद्धामा कैद भुक्तान गरिरहेका थिए भने मृतक जवेगु कर्तव्य ज्यानको मुद्धामा ८ वर्ष अघिदेखि कैद भुक्तान गरिरहेको कारागारका प्रमुख मुखियाले जानकारी दिएका छ्न ।
