काठमाण्डौः अन्तराष्ट्रिय क्रिकेट काउन्सिल (ICC) ले नेपाल क्रिकेट संघ (CAN) को निलम्बन सशर्त फुकुवा गरेको छ ।
दुबईमा सम्पन्न आईसीसीको बैठकले क्यानको निलम्बन सशर्त फुकुवा गर्ने निर्णय गरेको हो ।
आईसीसीले जारी गरेको विज्ञप्तिमा भनिएको छ ‘दुबईमा सम्पन्न आईसीसी बोर्डको बैठकले क्यानको प्रगतिलाई ध्यानमा राख्दै नेपाल र जिम्बावेलाई आईसीसी सदस्यको रूपमा स्वीकार गरेको छ’ ।
‘नेपालमा भएको प्रगतिलाई ध्यानमा राख्दै अब क्रिकेट एसोसिएसन अफ नेपाल (CAN)लाई सदस्यता मापदण्डको पूर्ण पालना गर्न सहयोग गर्ने र एउटा योजना तयार गरिनेछ’, आईसीसीका चियरम्यान सशांक मनोहरले भनेका छन्, ‘जसमा वित्तीय कोष पनि समावेश हुनेछ ।’
आईसीसीले निलम्बन गरेको साँढे ३ वर्षपछि क्यानलाई फुकुवा गरेको हो । सरकारी हस्तक्षेप र अवैधानिक चुनावको कारण देखाउँदै आईसीसीले क्यानलाई निलम्बन गरेको थियो ।
तर, आईसीसीको स्वतन्त्र कमिटिले क्यानको नयाँ नेतृत्वको निर्वाचन गर्दै नयाँ कार्यसमिति चयन गरेपछि क्यान फुकुवा भएको हो ।
काठमाडौंमा गत असोज १० र ११ भएको साधारण सभाले चतुरबहादुर चन्द नेतृत्वको नयाँ कार्यसमिति चयन भएको थियो ।
