काठमाण्डौं: जनकपुर विमानस्थलमा रहेको बुद्ध एयरको काउन्टर राष्ट्रिय जनता पार्टी नेपालका सांसदले तोडफोड गरेका छन् ।
सर्लाहीको निर्वाचन क्षेत्र नम्बर–१ बाट निर्वाचित प्रतिनिधिसभा सांसद प्रमोदकुमार साहले बुद्ध एयरको उडान करीब २ घण्टा ढिलाइ भएको भन्दै जनकपुर विमानस्थलको टिकट काउण्टरमा तोडफोड गरेका हुन् ।
सांसद साहले किड्नी उपचारको शिलशिलामा जनकपुरबाट काठमाण्डौं ल्याईदै गरेका जनकपुरधाम उपमहानगरपालिका-४ स्थायी घर भएका ६५ वर्षीय सौखीलाल चौधरीको स्वास्थ्य स्थिती जटिल बन्दै गएको र जहाज समयमै विमानस्थलमा अवतरण नगरेकोले आफू आवेशमा आएर बुद्ध एयरको काउण्टरमा तोडफोड गरेको स्वीकारेका छन् ।
बुद्ध एयरको व्यवस्थापन पक्षले काउण्टरमा तोडफोड पश्चात सांसद साहलाई बुद्ध एयरको विमान प्रवेशमै रोक लगाएको थियो ।
त्यसलगत्तै धनुषाका प्रमुख जिल्ला अधिकारीको पहलमा सांसद शाह काठमाडौँका लागि उडेको विमानस्थल प्रशासनले जनाएको छ ।
बुद्ध एयर व्यवस्थापन पक्षले प्राविधिक कारणले विमान ढिलाइ भएको यात्रुहरुलाई जानकारी गराएपनि सांसद साहले बुद्ध एयरको काउण्टरमा तोडफोड गरेको आरोप लगाएको छ ।
