काठमाण्डौः एभरेष्ट बैंकले गत आर्थिक वर्षको नाफाबाट शेयरधनीलाई २० प्रतिशत नगद लाभांस सहित ५ प्रतिशत बोनस शेयर दिने घोषणा गरेको छ।
बैंक सञ्चलक समितिको आईतबार बसेको बैंठकले गत आर्थिक बर्षको सञ्चित मुनाफाबाट चुक्ता पूँजीको २५ प्रतिशत लाभांस दिने घोषणा गरेको हो । बैंकको हालको चुक्ता पूँजी ८ अर्ब ६ करोड रुपैयाँ छ । ५ प्रतिशत बोनस शेयरपछि चुक्ता पूँजी ८ अर्ब ४६ करोड रुपैयाँ पुग्नेछ ।
लाभांस नेपाल राष्ट्र बैंकबाट स्वीकृति भएपछि साधारणसभामा लैजाने बैंकले जनाएको छ। दोस्रो बजारमा सूचिकृत कम्पनीमध्ये नियमित लाभांस प्रदान गर्ने एभरेष्ट बैंकले राम्रो लाभांस प्रदान गर्दै आएको छ ।
नेपाल राष्ट्र बैंकको पूँजी बृद्धि योजनापछि लाभांसदर घटेपनि बढ्दो नाफाले बैंकको लाभांस बाँड्ने क्षमता बढ्दै गएको छ।
बैंकले गत वर्ष तीन अर्ब चार करोड रुपैयाँ नाफा गरेको थियो। लाभांस वितरण गर्न योग्य नाफा भने दुई अर्ब १८ करोड रुपैयाँ छ । प्रतिशेयर आम्दानी ३७ रुपैयाँ भए पनि बैंकले जगेडा कोष बलियो बनाउदै २५ प्रतिशत मात्रै लाभांस दिएको हो ।
