काठमाण्डौः सत्तारुढ नेपाल कम्युनिष्ट पार्टी (नेकपा) को सचिवालय बैठकले पार्टी संगठन विभागमा ३ जना सदस्य थप गर्ने निर्णय गरेको छ।
प्रधानमन्त्री निवास बालुवाटारमा बुधबार बिहान सम्पन्न सचिवालय बैठकले संगठन विभागको सदस्यमा अष्टलक्ष्मी शाक्य, भानुभक्त ढकाल र हरि अधिकारीलाई थप गर्ने निर्णय गरेको प्रबक्ता नारायणकाजी श्रेष्ठले बताएका छन् ।
बैठकले आगामी मंसिर १४ गते सम्पन्न हुने उपनिर्वाचनमा नेकपाको तर्फबाट उम्मेदवार सिफारिस तथा टुंगो लगाउन १० कात्तिक भित्र प्रदेश तथा तल्लो तहका जिल्ला कमिटीहरुलाई निर्देशन दिने निर्णय गरेको छ ।
यसरी टुंग्याइने प्रतिनिधि सभा र प्रदेश सभा सदस्यको हकमा सम्बन्धित जिल्ला कमिटी र प्रदेश कमिटीबाट सिफारिश गरि केन्द्रीय कमिटीले नाम टुंग्याउने प्रबक्ता नारायणकाजी श्रेष्ठले बताए ।
गाउँपालिका र नगरपालिकाको प्रमुख/उपप्रमुख र मेयर/उपमेयरको हकमा नगर कमिटीको सिफारिशमा प्रदेश कमिटीले उम्मेदवारको नाम टुंग्याउने बैठकले निर्णय गरेको छ ।
यसैगरी वडाको हकमा सम्बन्धित वडा कमिटीको सिफारिशमा जिल्ला कमिटीले उम्मेदवारको अन्तिम टुंगो लगाउने निर्णय भएको छ ।
प्रधानमन्त्री केपी शर्मा ओलीको अध्यक्षतामा बसेको बैठकमा अर्का अध्यक्ष प्रचण्ड, माधब कु नेपाल, झलनाथ खनाल, बामदेब गौतम लगायतका नेताहरूको उपस्थिति रहेको थियो ।
