काठमाण्डौं: प्रहरीले बिशेष सुराककीको आधारमा दाङबाट नेत्रविक्रम चन्द विप्लव नेतृत्वको नेकपाका २१ जना नेता कार्यकर्ताहरूलाई पक्राउ गरेको छ ।
गोप्य सूचनाको आधारमा प्रहरीको बिशेष टोलीले दाङको राजपुर–४ मुंग्रेटा खोला स्थित चुरे जंगलमा नेकपा राप्ती ब्यूरोको बैठक बसिरहेको बेला उनीहरूलाई बिहीबार बिहान १ बजे नियन्त्रणमा लिएको हो ।
प्रहरीको सर्च अप्रेसनका क्रममा बैठक स्थलमा घेरा हाली नेकपा महासचिव नेत्र विक्रम चन्द विप्लवका दाजु तत्कालिन पोलिटब्यूरो सदस्य एवं वर्तमान केन्द्रीय सदस्य चन्द्रबहादुर चन्द बिरजंग), राप्ती ब्यूरो इन्चार्ज केशवबहादुर बाठा मगर (सुवास) लगायतलाइ पक्राउ गरेको हो ।
पक्राउ पर्नेहरूमा राप्ती ब्यूरो सदस्यहरू तिलक पुन, सबिन पोखरेल, दाङ इन्चार्ज यम बहादुर कटवाल, युवा संगठनका केन्द्रिय अध्यक्ष पाटन जंगली, बुद्धीजिवी संगठनका केन्द्रिय सुनिल पौडेल, विक्रम लगायत २१ जना नेताहरू रहेका छन् ।
नेकपा विप्लव पार्टी स्रोतका अनुसार पक्राउ पर्नेहरुमा अधिकांश ब्यूरो तहका नेता रहेका छन् र बाँकीको नाम एकिन नभएको बताएको छ । प्रहरीले भने २१ जना गिरफ्तार गरिएको भनिएपनि ७ जना बाहेक अरूको नाम खुलाएको छैन ।
पक्राउ सम्बन्धी थप विवरण आँउन बाँकी रहेको बताइएको छ ।
