काठमाण्डौः निर्वाचन आयोगले प्रतिनिधिसभा, प्रदेशसभा र स्थानीय तहको निर्वाचनको कार्यतालिका सार्वजनिक गरेको छ ।
आगामी मंसिर १४ गतेका लागी तय भएको उपनिर्वाचनको लागि निर्वाचन आयोगले शुक्रबार निर्वाचन कार्यतालिका सार्वजनिक गरेको हो ।
मंसिर १४ गते हुने उपनिर्वाचनमा ५२ पद रिक्त छन् । जसमध्य प्रतिनिधिसभा सदस्य १ जना, प्रदेश सभा सदस्य ३ जना र स्थानीय तहका जनप्रतिनिधि ४८ जना जनप्रतिनिधी चयनका लागि निर्वाचन हुन लागेको हो ।
आयोगका अनुसार प्रतिनिधिसभा र प्रदेश सभाको हकमा कार्तिक २१ गते उम्मेद्वारको मनोनयन दर्ताको मिति तोकिएको छ ।
यसैगरी आयोगले कार्तिक २१ गते उम्मेद्वारको सूची प्रकाशन गर्ने, २२ गते बिहान ११ बजेदेखि अपरान्ह ५ बजेसम्म उम्मेद्वारको विरोधमा उजुरी दिने समय निर्धाण गरेको जनाएको छ ।
यसैगरी कार्तिक २३ गते मनोनयनपत्र र उजुरी उपर जाँचबुझ गर्ने तथा उम्मेद्वारको नामावली प्रकाशन गर्ने आयोगको चुनावी कार्यतालिका रहेको छ ।
कार्तिक २४ गते उम्मेद्वारले नाम फिर्ता लिने र उम्मेद्वारको अन्तिम नामावली प्रकाशन गर्ने कार्यक्रम रहेको आयोगले विज्ञप्ती मार्फत जनाएको छ ।
यसैगरी कार्तिक २५ गते उम्मेद्वारलाई निर्वाचन चिन्ह प्रदान गरिने आयोगले जनाएको छ । मंसिर १४ गते बिहान ७ बजेदेखि अपरान्ह ५ बजेसम्म मतदानको समय निर्धारण गरिएको छ ।
त्यस्तै आयोगले स्थानीय तहका लागि कार्तिक २७ गते उम्मेद्वारको मनोनयनपत्र दर्ता गर्ने, उम्मेद्वारको सूची प्रकाशन गर्ने, २८ गते उम्मेद्वारको विरोधमा उजुरी दिने समय निर्धारण गरिएको आयोगले जानकारी दिएको छ ।
त्यस्तै २९ गते मनोनयनपत्र र उजुरीमाथि जाँचबुझ गरिने, मनोनयन भएको उम्मेद्वारको नामावली प्रकाशन गर्ने कार्यक्रम तोकिएको छ । आयोगका अनुसार ३० गते नै उम्मेद्वारले नाम फिर्ता लिने र उम्मेद्वारको अन्तिम नामावली प्रकाशन हुनेछ ।
यसैगरी आयोगले मंसिर १ गते उम्मेद्वारलाई निर्वाचन चिन्ह प्रदान गर्नेछ । आयोगले मंसिर १४ गते बिहान ७ बजेदेखि अपरान्ह ५ बजेसम्म मतदानको समय निर्धारण गरेको छ । मंसिर १४ गते तीनै तह गरी ५२ पदका लागि उपनिर्वाचन हुँदैछ ।
