काठमाडौँ । आईसीसी क्रिकेट विश्वकप लिग २ अन्तर्गत नेपालले आज यूएईसँग प्रतिस्पर्धा गर्दैछ। कीर्तिपुरस्थित त्रिवि मैदानमा केहीबेरमै सुरु हुने खेलमा नेपालले पहिले ब्याटिङ गर्ने निर्णय गरेको छ।
नेपालका कप्तान रोहित पौडेल ले टस जित्दै ब्याटिङ रोजेका हुन्। घरेलु मैदानमा सुरुआती दबाब लिनु भन्दा स्कोर बोर्डमा रन राखेर खेल नियन्त्रणमा राख्ने रणनीतिअनुसार नेपालले पहिले ब्याटिङ रोजेको मानिएको छ।
यस खेलमा टोली संयोजनमा केही परिवर्तन गरिएको छ। नियमित ओपनर कुशल भुर्तेल र आसिफ शेख लाई विश्राम दिइएको छ भने उनीहरूको स्थानमा अर्जुन कुमाल र विनोद भण्डारी लाई मौका दिइएको छ। नयाँ ओपनिङ जोडीले सुरुवात कस्तो गर्छ भन्नेमा सबैको ध्यान केन्द्रित छ।
नेपालका लागि यो खेल अंक तालिकामा सुधार ल्याउने महत्वपूर्ण अवसरका रूपमा हेरिएको छ। घरेलु समर्थकको साथ र नयाँ संयोजनसँगै टोलीले बलियो प्रदर्शन गर्ने अपेक्षा गरिएको छ।
