काठमाण्डौ: चीन सरकारले नेपाली सेनालाई सैन्य सामाग्री उपलब्ध गराउने भएको छ ।
चीन भ्रमणमा रहेका उपप्रधान तथा रक्षामन्त्री ईश्वर पोखरेल र चिनियाँ रक्षामन्त्री जनरल वेइ फेंघेबीच बेइजिङमा नेपाली सेनालाई मानवीय तथा विपद् व्यवस्थापनसँग सम्बन्धित सैन्य सामाग्री उपलब्ध गराउने सम्झौतापत्रमा हस्ताक्षर भएको हो ।
चिनियाँ राष्ट्रपतिको नेपाल भ्रमणका क्रममा चीनले गरेको सहमति अनुरुप आइतबार नेपाली सेनालाई १५० मिलियन युआन बराबरको सामग्री उपलब्ध गराउने दुवै पक्षबीच सम्झौतापत्रमा हस्ताक्षर भएको छ ।
सम्झौता अन्तर्गत नेपालले प्रस्ताव गर्ने सामग्रीको विवरणका आधारमा प्रोटोकलमा समझदारी गरे बमोजिम आगामी तीन वर्षको अवधिमा नेपाललाई मानवीय तथा विपद् व्यवस्थापनका लागि आवश्यक सामाग्री उपलब्ध हुने भनिएको छ ।
उपप्रधानमन्त्री पोखरेल र चिनियाँ रक्षामन्त्रीबीच द्विपक्षीय सम्बन्ध र पारस्परिक हितका विषयमा वार्ता पश्चात् सो सम्झौतापत्रमा हस्ताक्षर भएको हो ।
