काठमाण्डौं : भरतपुरस्थित चितवन मेडिकल कलेजमा उपचारका क्रममा बिरामीको मृत्यु भएपछि मृतकका आफन्तहरुले अस्पताल तोडफोड गरेका छन् ।
नवलपुरको मध्यविन्दु नगरपालिका–९ की ३२ वर्षीया आशा ज्ञवालीलाई नाक भित्र मासु पलाएर सोमबार चितवन मेडिकल कलेज अस्पतालमा उपचारको लागि लगिएकोमा उनको शनिबार उपचारको क्रममा मृत्यु भएको थियो ।
चिकित्सकको लापरवाहीका कारण मृत्यु भएको आरोप लगाउदै आफन्तहरुले अस्पताल प्रवेशद्वार, राजमार्ग छेउको गेटमा तोडफोड गरेका छन् ।
प्रर्दशनकारी र प्रहरीबीच अस्पताल परिसरमै ढुंगा हानाहान भएपछि अस्पतालमा उपचारका गराउन आएका बिरामीहरुको समेत भागाभाग भएको थियो ।
प्रहरीले भिडलाई नियन्त्रणमा लिन ४० सेल अश्रुग्याँस समेत प्रहार गरेको प्रहरीले जनाएको छ ।
त्यसैगरी प्रदर्शनकारले हाने ढुँङ्गाले अस्पतालको अति संबेदनशिल कक्ष (आईसीयु) र पोस्ट अपका झ्यालको सीसाहरु फुटेको छ ।
बिरामीको मृत्युपछि अस्पताल प्रशासन र बिरामीका आफन्तबीच शनिबार साँझ भएको वार्तामा औषधि उपचार खर्च मिनाहा गरिदिने कुरामा वार्ता भइरहँदा विरामिका आफन्तले अस्पतालमा ढुंगा हानेपछि वार्ता स्थगित भएको थियो ।
प्रदर्शनकारीले गरेको ढुङ्गामुडाबाट ५ जना प्रहरी घाइते भएका छन् ।
घटनामा संलग्न रहेको आरोपमा प्रहरीले १२ जना प्रदर्शनकारीलाई नियन्त्रणमा लिएको प्रहरी नायव उपरीक्षक एकनारायण कोइरालाले बताए।
