काठमाडौं । नेपाली कांग्रेसको १५औँ महाधिवेशन काठमाडौंको खुलामञ्चमा सुरु भएको छ। यसपटक कांग्रेसले विगतका महाधिवेशनभन्दा फरक शैली अपनाउँदै भड्किलो तामझाम र ठूला जुलुसलाई प्राथमिकता नदिई सरल ढङ्गले महाधिवेशन आयोजना गरेको छ।
भदौ १० गते भोटेकोशी क्षेत्रमा आएको बाढीबाट भएको जनधनको क्षतिलाई ध्यानमा राख्दै महाधिवेशनलाई सकेसम्म सादगीपूर्ण बनाउने निर्णय कांग्रेसले गरेको हो। त्यसैअनुसार महाधिवेशनअघि विगतमा जस्तो ठूलो प्रदर्शन तथा जुलुससहितका कार्यक्रम आयोजना गरिएनन्।
खुलामञ्चमा आयोजित उद्घाटन समारोहमा कांग्रेस सभापति गगन थापा र नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ले संयुक्त रूपमा महाधिवेशन उद्घाटन गरेका छन्।
उद्घाटन समारोहमा विभिन्न राजनीतिक दलका नेताहरूले सम्बोधन गरिरहेका छन्। कार्यक्रममा कांग्रेसका नेता, कार्यकर्ता तथा महाधिवेशन प्रतिनिधिहरूको उल्लेख्य सहभागिता रहेको छ।
खुलामञ्चको दर्शक दीर्घा कांग्रेसका नेता–कार्यकर्ता तथा प्रतिनिधिहरूले भरिएको छ। महाधिवेशनस्थलमा सहभागीहरूको उपस्थितिले नयाँ नेतृत्व चयनका लागि कांग्रेसभित्र देखिएको उत्साहसमेत झल्काएको छ।
महाधिवेशनले पार्टीको आगामी नेतृत्वसँगै संगठन, नीति तथा राजनीतिक दिशाबारे पनि महत्वपूर्ण निर्णय गर्ने अपेक्षा गरिएको छ। सादगीपूर्ण रूपमा सुरु गरिएको यसपटकको महाधिवेशनलाई कांग्रेसले प्राकृतिक विपत्तिको संवेदनशीलतालाई ध्यानमा राख्दै नेतृत्व चयन र नीति निर्माणमा केन्द्रित गर्ने प्रयासका रूपमा लिएको छ।












