महेन्द्रनगर, १९ असोजः भीमदत्त नगरपालिकाले तीन वर्षअघि जेहेन्दार छात्र ललित सार्कीलाई एमबीबीएस अध्ययन गर्न छात्रवृत्ति प्रदान गर्यो ।
स्थानीय जिमुवाका पारिवारिक रुपमा आर्थिक अवस्था कम्जोर मेधावी विद्यार्थी सार्कीले घरमै स्वअध्ययन गरी एमबीबीएस नाम निकाल्न सफल भएको घटनाले त्यस बेला निकै चर्चा पाएको थियो । अहिले पाटन स्वास्थ्य विज्ञान प्रतिष्ठानमा तेस्रो बर्षमा अध्ययनरत सार्कीलाई भीमदत्त नगरपालिकाले उच्च शिक्षा अध्ययन छात्रवृत्तिबाट रु दुई लाख प्रदान गरिरहेको छ ।
“भीमदत्त नगरपालिकाले सम्मानसहित छात्रवृत्ति रकम गत वर्ष पनि दिएको छ ।” एमबीबीएस अध्ययनरत सार्कीले रासससित भन्नुभयो, “छात्रवृति रकमले अध्ययनका लागि शैक्षिक सामग्री र अन्य खर्च व्यवस्थापनमा सहजता मिलेको छ ।” उक्त नगरपालिका शिक्षा शाखाका अधिकृत कलावती मिश्र भट्टले एमबीबीएस अध्ययनरत दुई जना विद्यार्थीलाई पालिकाबाट रु दुई लाखका दरले छात्रवृत्ति रकम प्रदान गरिरहेको जानकारी दिनुभयो ।
त्यहाँबाट छात्रवृत्ति प्राप्त सार्कीसँगै भीमदत्त नगरपालिकाकै अर्का विद्यार्थी लोकेश भट्ट पनि पाटन स्वास्थ्य विज्ञान प्रतिष्ठानमा एमबीबीएस अध्ययरत हुनुहन्छ । उक्त नगरपालिकाले स्थानीय गरिब तथा जेहेन्दार विद्यार्थीलाई प्रदान गर्दै आएको छात्रवृत्तिले अध्ययनमा सहजता मिलेको छ ।
जेहेन्दार विद्यार्थीलाई छात्रवृत्ति प्रदान गरेपछि भीमदत्त नगरपालिकाका अमृता मल्ल नेपाल वेष्र्टन एकेडेमीमा बिबिएस अध्ययनरत हुनुहुन्छ । उहाँलाई छात्रवृत्ति स्वरुप रु ५० हजार प्रदान गरिएको नगरपालिकाको शिक्षा शाखाले जनाएको छ ।
यसैबीच, गत आर्थिक वर्षदेखि नगरपालिकाले उच्च शिक्षामा महिलाको पहुँच वृद्धि गर्ने भन्दै ‘छोरी बुहारी उच्च शिक्षा अध्ययन छात्रवृत्ति’ कार्यक्रम सञ्चालन गरेको छ । नगरपालिकाका उपप्रमुख निलम लेखक जोशीले उक्त कार्यक्रमबाट हाल सात जना छोरी बुहारीलाई छात्रवृत्ति प्रदान गरिएको जानकारी दिनुभयो । गत वर्ष सात जना छोरी बुहारीलाई अध्ययनका लागि रु चार लाख ५० हजार छात्रवृत्ति रकम वितरण गरिएको उपप्रमुख लेखक बताउनुभयो ।
“आर्थिक अभावका कारण कोही पनि छोरी बुहारी अध्ययनबाट वञ्चित हुन नपरोस् भनी यो कार्यक्रम ल्याएका हौँ ।” उहाँले भन्नुभयो–“ शिक्षा र स्वास्थ्यमा नगरपालिकाले बजेट पनि प्राथमिकता दिएर ल्याएको छ ।” नगरपालिकाले छात्रवृत्ति प्रदान गरेका विद्यार्थी प्राविधिक शिक्षा अध्ययनलाई जोड दिइरहेका छन् । सोही अनुरुप एमबीबीएस अध्ययन गर्न दुई जनालाई जनही रु दुई लाख र इञ्जिनियरिङ पढ्न तीन जनालाई जनही रु एक लाख छात्रवृत्ति स्वरुप प्रदान गरेको हो ।
त्यस्तै नर्सिङ, फार्मेसी, विज्ञान, व्यवस्थापन, शिक्षा र मानविकीलगायत अन्य सङ्कायमा अध्ययन गर्ने विद्यार्थीलाई पनि पालिकाले जनही रु ५० हजारका दरले छात्रवृति प्रदान गरेको छ । छोरी बुहारी उच्च छात्रवृत्ति पाउनेमा नगरपालिकाभित्र बसोबास गर्ने विमला टमटा, रमिता तिवारी, रश्मि भट्ट, श्रृजना जोशी सुदूरपश्चिम विश्वविद्यालयमा अध्ययरत हुनुहुन्छ । त्यस्तै छात्रवृति प्राप्त प्रकृति भट्ट, सपना जोशी र सोनिया चन्द जिल्लाबाहिर अध्ययनरत रहेको भीमदत्त नगरपालिका कार्यालयले जनाएको छ ।
