काठमाण्डौं : पेट्रोल पम्प सञ्चालक मनोज साहको गोली हानी हत्या गरिएको बिरोधमा नेपाल पेट्रोलीयम डिलर्स राष्ट्रिय एशोसिएसनले शनिबार जनकपुरधामका सम्पुर्ण पेट्रोल पम्पहरु बन्द गर्ने घोषणा गरेको छ ।
संवेदनशील पेट्रोलीयम पदार्थको क्षेत्रका व्यवसायीहरु असुरक्षित रहेको भन्दै शनिवार जनकपुरधाम अन्तर्गत रहेका पेट्रोल पम्पबाट पेट्रोलियम पदार्थ विक्रि वितरण नगर्ने एशोसिएसनले जनाएको हो ।
यस्तै शनिबार प्रदेश नम्बर २ अन्तर्गत रहेका पाँच जिल्ला (महोत्तरी, सर्लाही, रौतहट, बारा,पर्सा)हरुमा दुई घण्टाको लागि पेट्रोलयम पदार्थ विक्री वितरण ठप्प पार्ने एशोसिएसनका अध्यक्ष लिलेन्द्र प्रसाद प्रधानले बताएका छन् ।
हत्यामा संलग्न पंकज चौधरीलाई प्रहरीले बुधबार नै पक्राउ गरेको छ ।
निर्माण व्यवसायी पंकज चोधरीले मनोजको सपहीस्थित न्यू शिव आयल स्टोर्सबाट आठ लाख रुपैयाँ बराबरको डिजेल उधारो लिएका थिए । सो रकम लेनदेनको विवादमा गोली हानिएको हुनसक्ने प्रहरीको प्रारम्भिक अनुसन्धानबाट खुलेको छ ।
