काठमाडौँ । नेपालका लागि भारतीय कार्यवाहक राजदूत तथा काठमाडौंस्थित भारतीय दूतावासका डेपुटी चिफ अफ मिसन (डीसीएम) डा. राकेश पाण्डेले परराष्ट्रमन्त्री शिशिर खनालसँग भेटवार्ता गरेका छन्।
पाण्डे परराष्ट्रमन्त्री खनाललाई भेट्न सिंहदरबारस्थित परराष्ट्र मन्त्रालय पुगेका हुन्। भेटवार्ताका क्रममा नेपाल–भारत द्विपक्षीय सम्बन्ध, आपसी सहकार्य तथा समसामयिक विषयमा छलफल भएको जनाइएको छ।
भेटमा दुई देशबीच रहँदै आएको सम्बन्धलाई थप सुदृढ बनाउने तथा पारस्परिक हित र सहकार्यका विषयमा विचारविमर्श भएको बताइएको छ। नेपाल र भारतबीच राजनीतिक, आर्थिक, व्यापारिक, विकास तथा जनस्तरको सम्बन्ध रहँदै आएको छ।
यद्यपि, परराष्ट्रमन्त्री खनाल र भारतीय कार्यवाहक राजदूत पाण्डेबीच भएको छलफलका विषयमा दुवै पक्षबाट विस्तृत औपचारिक जानकारी सार्वजनिक गरिएको छैन।
