काठमाण्डौः जनकपुरको मुजेलियास्थित शिव आयल पेट्रोल पम्पका सञ्चालक मनोज साह हत्याको विरोधमा धनुषासहित प्रदेश २ का विभिन्न जिल्लामा रहेका सबै पेट्रोल पम्प बन्द गरिएको छ ।
जनकपुरको मुजेलियास्थित पेट्रोल पम्प सञ्चालक मनोज साह हत्याको विरोधमा पेट्रोलियम डिलर्स एसोसिएशनको आह्वानमा व्यवसायीहरुले शनिबार पेट्रोल पम्प बन्द गरेका हुन् ।
प्रदेश २ मा रहेका सबै पेट्रोल पम्प बन्द गरिएपछि सेवाग्राहीहरू मारमा परेका छन् । पेट्रोलियम पदार्थ जस्तो संवेदनशील क्षेत्रमा लगानी गर्ने व्यवसायीहरू असुरक्षित रहेको भन्दै एसोसिएशनले धनुषा लगायत प्रदेश २ का जिल्लाहरू रौतहट, बारा, महोत्तरी, सिरहा, सर्लाही, र पर्साका व्यवसायीहरुले शनिबार तेल नबेच्ने घोषणा गरेका हुन् ।
तर महोत्तरी, सर्लाही, रौतहट, बारा र पर्साका पम्प पनि दुई घण्टा मात्र बन्द रहने एसोसिएशनले जनाएको छ । एसोसिएशनका अध्यक्ष लिलेन्द्रप्रसाद प्रधानले एक विज्ञप्ति जारी गर्दै व्यवसायी सुरक्षाको प्रत्यभूति गर्न र दोषीलाई कडा कारबाही गर्न माग गरिको छ ।
तीन दिन पहिले जनकपुरधाममा पेट्रोल पम्प सञ्चालन गर्ने व्यवसायी मनोज साहको गोली हानी हत्या गरिएको थियो । हत्यामा संलग्न पंकज चौधरीलाई प्रहरीले दुई थान हतियार र २२ राउण्ड गोलीसहित बुधबार नै पक्राउ गरेको थियो ।
