काठमाण्डौं । दाङको राजपुर गाउँपालिकामा एक व्यक्तिको शरीरमा पेट्रोल छर्केर आगो लगाई फरार भएका व्यक्ति पक्राउ परेका छन् ।
जिल्ला प्रहरी कार्यालय दाङका अनुसार राजपुर गाउँपालिका २ मटेरियाका ३८ वर्षीय त्रिलोकसिंह कार्कीले सोही ठाउँका ४१ वर्षीय रुपलाल चौधरीको शरीरमा पेट्रोल छर्केर आगो लगाएका थिए।
गत कात्तिक २८ गते दिउँसो करिब साढे २ बजे कार्कीले आफ्नो मोटरसाइकलबाट पेट्रोल निकालेर चौधरीको शरीरमा छर्की आगो लगाएको प्रहरीको भनाइ छ । घटनापछि फरार भएका कार्कीको खोजी गर्ने क्रममा प्रहरीले उनलाई लमही नगरपालिका–५ रातोडाँडाबाट फेला पारी नियन्त्रणमा लिएको जिल्ला प्रहरी कार्यालय दाङका प्रहरी निरीक्षक श्रीकुमार पौडेलले जानकारी दिनुभयो ।
उहाँको अनुसार आगोले घाइते भएका चौधरीलाई उपचारका लागि लमही अस्पताल लगिएको थियो । थप उपचारका लागि उहाँलाई नेपालगञ्जस्थित भेरी अञ्चल अस्पतालमा रिफर गरिएको जिल्ला प्रहरी कार्यालय दाङका प्रहरी निरीक्षक पौडेलले जानकारी दिनुभयो । पक्राउ परेका कार्कीमाथि थप अनुसन्धान भइरहेको प्रहरीले जनाएको छ ।
