काठमाडौः सत्तारूढ समाजवादी पार्टी र प्रतिपक्षी राष्ट्रिय जनता पार्टी (राजपा) बीच मंसिर पहिलो साताभित्र एकीकरण हुने भएको छ ।
दुवै दलका शीर्ष नेताहरूबीच विभिन्न चरणमा भएको छलफलमा उक्त सहमती भएको हो । हाल दुबै पार्टी एकिकरण पछि एकीकृत पार्टीको नेतृत्व, सिद्धान्त, नीति तथा कार्यक्रम लगायतका विषयमा छलफल केन्द्रित रहेको बताइएको छ ।
एकीकरणपछि संगठनको नेतृत्व कस्तो हुने र अन्य शीर्ष नेतालाई जिम्मेवारी के कस्तो हुने भन्नेबारे छलफल भइरहेको एक नेताले बताए ।
राजपा नेपाल अध्यक्षमण्डलका सदस्य राजेन्द्र महतोले पार्टी एकताका लागि भएका छलफल सहमति नजिक पुगेको दाबी गरेका छन् । जनकपुरमा आयोजित एक कार्यक्रमलाई सम्बोधन गर्दै राजपा नेपाल वार्ता टोलीका संयोजक समेत रहेका नेता महतोले छलफल अन्तिम चरणमा पुगेको बताएका हुन् ।
एकीकृत पार्टीको नाम, झन्डा, छाप, भ्रातृ संगठनको स्वरूप सहित नीति तथा नेतृत्व लगायतका विषयमा छलफल सहमति नजिक पुगेको उनको भनाइ थियो । विगत केही समयदेखि दुवै पार्टीबीच एकताका लागि गोप्य छलफल चलिरहेको छ । छलफलमा मुख्यतः एकीकृत पार्टीको नेतृत्वकै विषयमा नेताहरू बढी केन्द्रित हुने गरेका छन् । वैकल्पिक शक्ति निर्माण, संविधान संशोधनसहित आगामी दिनमा मूल राजनीतिको नेतृत्व गर्ने गरी अगाडि बढन खोजिएको नेता बताउँछन् ।
दुई पार्टीबीच एकताका लागि छलफल सकारात्मक रहेको बताइए पनि राजपाका नेता महतोले एकीकृत पार्टीमा सर्वोच्च नेता महन्थ ठाकुर हुनुपर्ने र समाजवादी पार्टीले सरकार छाड्नुपर्ने सर्त अगाडि सारेको बताए ।
राजपामा महतो सहित महेन्द्र राय यादव र शरतसिंह भण्डारी एकताको पक्षमा छन् भने अनिल कुमार झा र राजकिशोर यादव अहिलेकै अवस्थामा एकीकरण गर्न नहुने पक्षमा उभिएका छन् । ठाकुर आफूले एकीकृत पार्टीको नेतृत्व सहित सर्वोच्च नेता भए पार्टी एकीकरण गरिने नभए नगरिने पक्षमा उभिएका छन् ।
यसैबीच समाजवादी पार्टीकी उपाध्यक्ष रेणु यादवले मंसिरको पहिलो साताभित्र राजपा नेपालसँग पार्टी एकीकरण हुने दाबी गरेकी छन् । प्रदेश २ सरकारद्वारा जनकपुरस्थित मधेस भवनमा दीपावली र छठको अवसरमा आयोजित शुभकामना आदान–प्रदान कार्यक्रममा उनले एकताको कुरा धेरै अघि बढिसकेको र मंसिर पहिलो सातासम्म दुई पार्टीबीच एकीकरण हुने बताइन् ।
