काठमाण्डौः ओखलढुंगामा राप्रपा (संयुक्त)को सिंगो जिल्ला समिति नै काँग्रेसमा प्रवेश गरेको छ । शनिवार चिसंखुगढी गाउँपालिकामा आयोजित पार्टी प्रवेश कार्यक्रममा जिल्ला सभापति नारायणबहादुर सुवेदी, उपाध्यक्ष मुगाधन राई, कोषाध्यक्ष दिनेश सुवेदी सहित जिल्ला कार्यसमित नेपाली काँग्रेसमा प्रवेश गरेको हो ।
काँग्रेस प्रवेश गर्नेमा राप्रपा(संयुक्त) का जिल्ला सदस्यहरु जश बहादुर राइ, बमप्रसाद खतिवडा, शुक्रराज राई, प्रदिप राई लगायत छन् । यसैगरी सत्तारुढ दल नेकपाबाट शुक्रराज राई,पासाङ सेर्पा, आङ्सेरा सेर्पा ,फुर्बा सेर्पा लगायतको टोली पनि काँग्रेस प्रवेश गरेको छ ।
नवप्रवेशी राप्रपा (संयुक्त) तथा नेकपाका नेताहरुलाई नेपाली काँग्रेसका जिल्ला सभापति प्रदिप सुनुवार र नेता रामहरि खतिवडाले पार्टीमा स्वागत गरेका थिए । उक्त कार्यक्रम मार्फत ओखलढुंगामा अब राप्रपा संयुक्तको कुनै कमिटि नरहेको घोषणा समेत गरिएको छ ।
काँग्रेसमा प्रवेश गर्नेहरुले लोकतन्त्रको मूलधारमा आउन पाउँदा खुसी लागेको बताएका थिए । राप्रपा (संयुक्त) सहित नेकपाका कार्यकर्ताहरुलाई प्रवेश गराउँदै पूर्व सांसद रहेका नेता खतिवडाले सरकारका कामबाट असन्तुष्ट बनेका कार्यकर्ता काँग्रेसमा आएको बताए ।
राप्रपा (संयुक्त) र सत्तारुढ दल नेकपाबाट करिब १ सय भन्दा बढी काँग्रेस प्रवेश गरेको जिल्ला कार्यसमतिका प्रवक्ता राजकुमार ढुंगानाले जानकारी दिए ।
