काठमाण्डौः नेपाली काँग्रेसले उम्मेदवारको टुङ्गो लगाउन बिहीवार बिहान पदाधिकारी बैठक आव्हान गरेको छ ।
आगामी मङ्सिर १४ गते हुने उपनिर्वाचनमा पार्टीका तर्फबाट चयन गरिने उम्मेदवारका विषयमा छलफल छलफल गर्न पदाधिकारी बैठक बोलाइएको हो ।
काँग्रेसको स्थानिय (जिल्ला, क्षेत्र, नगर, गाँउपालिका एवं वडा) समितिले सिफारिस गरी पठाएका नामावलीमाथि छलफल गरी नाम टुङ्गो लगाउन पदाधिकारी तहमा छलफल गर्न लागेको पार्टीका मुख्य सचिव कृष्णप्रसाद पौडेलले जानकारी दिएका छन् ।
पार्टी सभापति शेरबहादुर देउवाको बुढानीलकण्ठ स्थित निवाशमा पदाधिकारी र उपनिर्वाचन हुने प्रदेशमा पार्टीको राष्ट्रिय जागरण अभियानमा खटिएका प्रतिनिधिसहितको बैठक बस्न लागेको उनले बताएका छन् ।
बैठकमा समसायिक राजनीति, उपनिर्वाचनमा पार्टीको तयारी, पार्टीका केन्द्रीय विभाग गठन लगायतका विषयमा समेत छलफल हुनेछ ।
पदाधिकारी बैठकमा सहमति भएका विषयमा निर्णय गर्न काँग्रेसले कात्तिक १५ गते शुक्रबार दिउँसो १ बजे केन्द्रीय कार्यसमितिको बैठक बोलाएको छ ।
उपनिर्वाचन हुने जिल्ला, प्रदेशसभा निर्वाचन क्षेत्र र स्थानीय तहबाट पार्टीका सम्बन्धित सबै निकायले उम्मेदवारको नाम सिफारिस गरिसकेको मुख्य सचिव पौडेलले जानकारी दिएका छन ।
यसअघि सबै जिल्ला, प्रदेशसभा निर्वाचन क्षेत्र र स्थानीय तहबाट उम्मेदवारका नामावली सिफारिस भइ प्राप्त नभएको भन्दै कात्तिक ७ गते बोलाइएको केन्द्रीय कार्यसमितिको बैठक बस्दै नबसी स्थगित गरिएको थियो ।
मङ्सिर १४ गते हुने उपनिर्वाचनबाट ३७ जिल्लाका विभिन्न रिक्त पदमध्ये प्रतिनिधिसभा सदस्य एक, प्रदेशसभा सदस्य तीन तथा स्थानीय तहका प्रमुख एक, अध्यक्ष तीन, उपाध्यक्ष एक र वडाध्यक्ष ४३ गरी जम्मा ५२ पदका लागि निर्वाचन हुँदैछ ।
