काठमाण्डौः साझा पार्टीले भक्तपुरको प्रदेशसभामा सुरज प्रधानलाई उमेद्वार बनाउने निर्णय गरेको छ ।
पार्टीको केन्द्रीय कार्यालय, बखुण्डोलमा बिहीबार पत्रकार सम्मेलन मार्फत साझाले २८ वर्षीय सुरज प्रधानलाई भक्तपुर क्षेत्र नं १ (क) बाट प्रदेशसभा उम्मेदवार बनाउने घोषणा गरेको हो ।
यही मंसिर १४ गते हुने उपनिर्वाचनमा पार्टीको तर्फबाट भक्तपुर संयोजक प्रधानलाई उम्मेदवार बनाउने निर्णय भएको साझा पार्टीका प्रवक्ता डा. सूर्यराज आचार्यले बताएका छन् ।
भक्तपुर जिल्ला संयोजकको रुपमा सक्रिय रहेका प्रधान विगत लामो समयदेखि समाजसेवा र वातावरण अभियानकर्ताको रुपमा क्रियाशील प्रधान वातावरणमैत्री ईट्टा उत्पादक व्यवसायी समेत हुन् ।
उम्मेदवार प्रधानले पद्धति, पारदर्शिता, इमान्दारी र उत्कृष्टताको चार खम्बामा अडिग रहेर राजनीतिक जिम्मेवारी वहन गर्न प्रतिबद्ध प्रधानले निर्वाचित भएको खण्डमा पुरै तलब आफ्नो निर्वाचन क्षेत्र भित्र कल्याणकारी गतिविधिमा खर्च गर्ने दावी गरेका छन् ।
तत्कालीन नेकपा एमालेबाट निर्वाचित प्रदेशसभा सांसद हरिशरण लामिछानेको निधनपछि भक्तपुर क्षेत्र नम्बर १ (क) मा उपनिर्वाचन हुन लागेको हो । २०७५ साल वैशाख ३१ गते मष्तिस्कघातका कारण लामिछानेको निधन भएको थियो ।
साझा पार्टीले आउँदो शनिबार १६ गते दाङ निर्वाचन क्षेत्र नं ३ (ख) को प्रदेशसभा उमेदवार दाङमैँ एउटा कार्यक्रमका बीच औपचारिक घोषणा गर्ने जनाएको छ ।
