काठमाण्डौः कपिलवस्तुको कृष्णनगरमा बुधबार लक्ष्मीपूजाको मूर्ति विर्सजन गर्न अवरोध गर्ने मुख्य योजनाकार जमाल साहलाई प्रहरीले शनिवार नियन्त्रणमा लिएको छ ।
कृष्णनगर बजारमा लुकिछिपी बसिरहेको अवस्थामा कपिलवस्तु प्रहरीले पक्राउ गरेको प्रहरी उपरीक्षक दीपशम्शेर जबराले बताए ।
पक्राउ परेका साहलाई अनुसन्धानका लागी जिल्ला प्रहरी कार्यालय तौलिहवामा पुर्याइएको छ । बुधबार लक्ष्मीपूजाको मूर्ति विसर्जनको क्रममा कृष्णनगरमा हिन्दु मुसलमान बिच झडप भएको थियो ।
उक्त झडप पश्चात प्रसासनले लगाएको कर्फ्युको अवज्ञा गर्ने क्रममा प्रहरीले चलाएको गोली लागेर कृष्णनगरमा व्यवसाय गर्दै आएका २० वर्षीय सुरजकुमार पाण्डेको ज्यान गएको थियो ।
अवस्था तनावग्रस्त बनेपछि प्रशासनले बिहीबार बिहान ११ बजेदेखि कृष्णनगरका केही क्षेत्रमा कर्फ्यु लगाएको थियो । दुवै पक्षबीच सहमति जुटेपछि प्रसासनले शनिबार बिहान ६ बजेदेखि कर्फ्यु हटाएको छ भने कृष्णनगर पूर्ववत अवस्थामा फर्किएको छ ।
