काठमाण्डौ: राष्ट्रपति विद्यादेवी भण्डारीले सातै प्रदेशका प्रमुखहरूलाई पदमुक्त गरेकी छन् ।
आईतबार बसेको मन्त्रिपरिषदको बैठकले सातै प्रदेशका प्रदेश प्रमुखहरुलाई पदमुक्त गर्न राष्ट्रपति समक्ष सिफारिस गर्ने निर्णय गरेको थियो । सोही निर्णय बमोजिम राष्ट्रपति भण्डारीले आइतबार साँझ सातवटै प्रदेशका प्रमुखलाई पदमुक्त गरेकी हुन् ।
संविधानको धारा १६५ को उपधारा १ (ख) बमोजिम प्रदेश प्रमुखहरुलाई पदमुक्त गरिएको राष्ट्रपति कार्यालयका प्रवक्ता हरि प्रसाद दाहालद्धारा जारी विज्ञप्तीमा जनाइएको छ ।
हटाइएका प्रदेश प्रमुखहरूमा प्रदेश १ बाट प्रा. डा. गोविन्दबहादुर तुम्बाहाङ, प्रदेश २ बाट रत्नेश्वरलाल कायस्थ, प्रदेश ३ बाट अनुराधा कोइराला रहेकी छन् । यसैगरी गण्डकी प्रदेश प्रमुख बाबुराम कुँवर, प्रदेश ५ प्रमुख उमाकान्त झा, कर्णाली प्रदेश प्रमुख दुर्गाकेशर खनाल र सुदूरपश्चिम प्रदेश प्रमुख मोहनराज मल्ल रहेका छन् ।
तत्कालीन शेरबहादुर देउवा नेतृत्वको सरकारले २०७४ साल माघ ३ गते प्रदेश प्रमुखहरु नियुक्त गरेको थियो ।
