काठमाण्डौ: बंगलादेशका राष्ट्रपति अब्दुल हमिद चारदिने भ्रमणका लागि नेपाल आउने भएका छन् ।
उच्च कुटनीतिक स्रोतबाट प्राप्त जानकारी अनुसार राष्ट्रपति हमिद नेपाल भ्रमणको लागी कात्तिक २६ नेपाल आउने मिति तय भइसके पनि दुवै देशले सार्वजनिक गरेका छैनन् ।
हमिदको भ्रमणबारे सबैभन्दा पहिले बंगलादेशका विदेश सचिव साहिदुल हगले कात्तिक ९ मा आयोजित पत्रकार सम्मेलनमा जानकारी दिएका थिए ।
बंगलादेशको अंग्रेजी दैनिक ‘द डेली स्टार’ का अनुसार विदेश सचिव हगले केही समयअघि अजरबैजानको बाकुमा सम्पन्न असंलग्न अभियानको १८ औं शिखर सम्मेलन लगत्तै गरिएको पत्रकार सम्मेलनमा हमिदले नेपाल भ्रमण गर्ने जानकारी दिएका हुन् ।
हमिदको नेपाल भ्रमणका क्रममा दुई पक्षबीच बीबीआईएन (बंगलादेश, भुटान, भारत र नेपाल) बीच हुने भनिएको मोटर भेहिकल सम्झौता र ऊर्जा व्यापार सम्झौता (पीटीए) हुने सम्भावना छ ।
सचिव हगले राष्ट्रपति हमिदको नेपाल भ्रमणका दौरान ती विषयमा सकारात्मक छलफल हुने बताएका छन् ।
उनले बीबीआईएनअन्तर्गत रहेर हुने भनिएको मोटर भेहिकल सम्झौताबाट भुटान पछि हटे पनि बाँकी तीन देश मिलेर अघि बढ्न सकिने बताएका थिए ।
नेपाल–भारत–भुटान र बंगलादेशबीच सीधा बस सेवा सञ्चालन गर्ने भनिए पनि भुटानले नमानेकाले हालसम्म उक्त काम अघि बढ्न सकेको छैन ।
नेपाल र भारतबीच सिधा बस सेवा अहिले सञ्चालनमा छ ।
