काठमाण्डौं: सत्तारुढ प्रमुख दल नेपाल कम्युनिष्ट पार्टी (नेकपा)को सचिवालय बैठकले सातवटै प्रदेशका प्रदेश प्रमुखहरुको नाम टुंगो लगाएको छ ।
प्रधानमन्त्री एवं नेकपा अध्यक्ष केपी शर्मा ओलीको अध्यक्षतामा प्रधानमन्त्रीको सरकारी निवास बालुवाटारमा बसेको बैठकले रिक्त प्रदेश प्रमुखहरुको नामावली टुंगो लगाएको हो ।
नयाँ प्रदेश प्रमुखहरुको लागि सिफारिस हुनेहरुमा अमिक शेरचन (चितवन), तिलक परियार (बाँके), धर्मनाथ यादव(सिरहा), सोमनाथ अधिकारी ‘प्यासी’ (कास्की), शर्मिला त्रिपाठी (चितवन), विष्णु प्रसाईं (झापा)र गोविन्द कलौनी (डडेलधुरा) रहेका छन् ।
सिफारिस भएकाहरुको नामलाई सोमबार आजै बस्ने मन्त्रिपरिषद्को बैठकले राष्ट्रपति विद्यादेवी भण्डारीसमक्ष सिफारिस गर्ने जनाईएको छ ।
सम्भवत राष्ट्रपतिबाट साँझसम्ममा नयाँ प्रदेश प्रमुखहरूको पद तथा गोपनियताको सपथ हुने बालुवाटार स्रोतले हरियालि नेपाललाई जानकारी दिए ।
नेकपा सचिवालय बैठकले छनाैट गरेका नामावलीलाई मन्त्रिपरिषद्ले राष्ट्रपतिसमक्ष सिफारिसका लागि पेस गरेपछि राष्ट्रपतिबाट नियुक्ति हुने संवैधानिक व्यवस्था छ । सातै प्रदेशका लागि सिफारिस भएका सबै नामावली नेकपा निकट हुन् ।
