प्रतिनिधिसभाका उम्मेदवारले २५ लाख र प्रदेशसभाका उम्मेदवारले १५ लाख खर्च गर्न पाउने सीमा तोकियो
काठमाण्डौ: उपनिर्वाचनका लागी उम्मेद्वारले प्रचारप्रसारमा गर्न पाउने खर्चको सीमा तोकिएको छ।
निर्वाचन आयोगले तोकेको खर्चको सिमा अनुसार प्रतिनिधिसभा सदस्य उम्मेदवारले २५ लाख र प्रदेशसभा सदस्य उम्मेदवारले १५ लाख रुपैयाँ खर्च गर्न पाउँछन् ।
प्रतिनिधिसभाको कास्की २, प्रदेशसभाको बागलुङ, दाङ र भक्तपुर गरि एक/एक क्षेत्रमा आगामी मंसिर १४ गते निर्वाचन हुँदैछ।
त्यस्तै उपमहानगरपालिका प्रमुख उम्मेदवारले ५ लाख ५० हजार उपमहानगरका वडाध्यक्षले २ लाख, गाउँपालिका अध्यक्ष र उपाध्यक्षले तीन लाख ५० हजार साथै वडाध्यक्षले एक लाख ५० हजार खर्च गर्न पाउने सिमा तोकेको आयोगले जनाएको छ।
दलहरूले उपनिर्वाचनका लागि कात्तिक २१ गतेसम्म उम्मेदवार मनोनयन गरिसक्नुपर्ने छ । अर्थ मन्त्रालयबाट आयोगलाई २५ करोड रुपैयाँ उपलब्ध गराएको बताएको छ ।
उपनिर्वाचन हुने चार जिल्लामा मुख्य निर्वाचन अधिकृतको कार्यालय खुलिसकेको र ३३ जिल्लामा बुधबारसम्म मुख्य निर्वाचन र निर्वाचन अधिकृतको कार्यालय खोलेसक्ने आयोगको तयारी रहेको छ ।
उपनिर्वाचनका लागि ४ लाख ५४ हजार ११४ मतदाता छन् भने २४७ मतदान स्थल र ५३७ मतदान केन्द्र रहेका छ्न ।
मंसिर १४ को उपनिर्वाचनका लागि प्रतिनिधिसभा सदस्य एक, प्रदेशसभा सदस्य तीन, उपमहानगरपालिका प्रमुख एक, गाउँपालिका अध्यक्ष तीन, उपाध्यक्ष एक र ४३ वडाध्यक्ष गरी ५२ पदका लागि उपनिर्वाचन हुने आयोगको जनाएको छ ।
