काठमाण्डौं: बझाङको बुङ्गल नगरपालिका-१ कालागाढमा निर्माणधीन कालङ्गा हाइड्रोको सुरूङभित्र फसेका चार जना मध्ये तीन जना मजदुरको शव फेला परेको छ ।
सुरुङभित्र पसेका चार जना मजदुर मध्ये दैलेखको गुराँस गाउँपालिका ३ का ३२ वर्षीय महेन्द्र शाही, सोही ठाउँका कर्ण शाही र अछामको तुर्माखाँद गाउँपालिका ६ का २८ वर्षीय महेन्द्र साउदको शव फेला परेको बझाङका प्रहरी प्रमुख एसपी गणेशबहादुर बमले जानकारी दिए ।
आइतबार दिउँसो बुङ्गल नगरपालिकामा रहेको सुरुङभित्र काम गर्न पसेका ६ जना मजदुर मध्ये २ जना सास फेर्न गाह्रो भएपछि बाहिर निस्किएका थिए ।
अन्य ४ जना मजदुर नफर्केपछि विपद व्यवस्थापक र उद्धार तालिम प्राप्त प्रहरी निरीक्षक लगाएत ९ जनाको विषेश उद्धार टोलीले सुरुङभित्र खोजी कार्य सुरु गरेको थियो ।
शसश्त्रको उद्धार टोलीले तिनै जना मृतकको शव सुरुङको १ किलो मिटर भित्र फेला पारेको थियो ।
मृतक तीनै जनाको शवलाई सुरुङबाट बाहिर निकालिएको र बझाङको बुंगल नगरपालिका वडा नम्बर १ का ३५ वर्षीय शेरसिंह धामी भने अझै बेपत्ता रहेकोले खोजी कार्य जारी रहेको प्रहरीले जनाएको छ ।
