काठमाण्डौ: काभ्रेमा श्रीमान श्रीमती मृत अवस्थामा फेला परेका छन्।
गयराती नमोबुद्ध नगरपालिका-८, तल्लोहटिया ठाँउमा ५५ वर्षीया श्यामकृष्ण श्रेष्ठ उनकी पत्नी अन्दाजी ५० बर्षकी रुकुमाया श्रेष्ठको शव फेला परेको प्रहरीले जनाएको छ ।
जिल्ला प्रहरी कार्यालय काभ्रेका प्रमुख एसपी जयराज सापकोटाका अनुसार मंगलबार बिहानै प्रहरी घटनास्थलमा पुगि आवश्यक अनुसन्धान गरिरहेको बताए ।
निज दम्पतीलाई धारिलो हतियार प्रयोग गरी क्षत विक्षत बनाई सिरकले छोपेको अवस्थामा शव फेला परेको श्यामपाटीमा रहेको प्रहरी चौकी इन्चार्ज प्रहरी सहायक निरीक्षक केशव दर्जीले जनाएका छ्न ।
मृतक श्रेष्ठ दम्पतिले त्यहाँस्थित तल्लो हटिया बजारमा आफ्नै घरमा चिया पसल सञ्चालन गर्दै आएको खुलेको छ । घटनास्थलमा वियरका बोतल, गाँजा र सुर्ति समेत फेला परेको प्रहरीले जनाएको छ ।
प्रहरीको प्रारम्भिक अनुसन्धानले श्रेष्ठ दम्पतिको पसलमा राति अबेरसम्म मदिरा सेवन गर्न आएकाहरुसँग विवाद भएर घटना भएको हुनसक्ने बताईएको छ । स्थानिय छिमेकीका अनुसार मृतक दम्पति राति ८ बजेतिर खाना खाएर सुत्न गएको भनी प्रहरीलाई बताएका छ्न ।
