काठमाण्डौ: भारती प्रहरीका उच्च अधिकारीहरुले आश्वासन दिएपछि दिल्ली प्रहरीको बिरोध प्रदर्शन टुंगिएको छ ।
मंगलबार राजधानी नयाँ दिल्लीमा करिब ११ घण्टासम्म चलेको प्रहरीको विरोध प्रदर्शन उच्च अधिकारीहरुले आश्वासन दिएपछि टुंगिएको हो ।
गत शनिबार दिल्लीको तीस हजारी अदालत परिसरमा प्रहरी र वकिलका बीचमा झडप भएपछि मंगलबार दिउँसो ठूलो संख्यामा प्रहरीहरु दिल्ली पुलिस हेडक्वार्टरको बाहिर प्रदर्शन गरेका थिए ।
राति करिब ८ बजे दिल्ली प्रहरीले आफ्नो धर्ना अन्त्यको घोषणा गरेका थिए । उनीहरुलाई कुनै लिखित आश्वासन नदिइए पनि माग पूरा गर्ने वचन दिइएको जनाइएको छ ।
उनीहरुलाई दिल्ली हाइकोर्टमा तीस हजारी कोर्टको बाहिर भएको हिंसाका बारेमा पुनर्विचार याचिका दर्ता गर्ने आश्वासन दिइएको छ ।
धर्नामा बसेका प्रहरीले प्रहरी संघ बनाउन पाउनुपर्ने, घाइते प्रहरीको उपचार हुनुपर्ने, निलम्बित प्रहरीलाई बहाली गर्नुपर्ने, वकिलको विरुद्धमा कारवाही गर्नुपर्ने र उनीहरुको लाइसेन्स फिर्ता लिनुपर्ने माग गरेका थिए ।
तीस हजारी कोर्टमा शनिबार वकिल र प्रहरीबीच पार्किङ्गको विषयलाई लिएर झगडा भएको थियो । (बीबीसी)
